भांगरभूंय | प्रतिनिधी
सेनिटेशन फी वसुलीचोय पालिकेचो निर्णय रद्द
भांगरभूंय । प्रतिनिधी
म्हापशें: म्हापशें पालिका मंडळाचे मंजुरी बगर पे पार्कींग शुल्क आनी सेनिटेशन फी (कोयर कर) ह्या करांनी केल्ली सुमारा भायल वाड पालिकेन फाटीं घेतल्या. सोपो कर दरवाड मात जैसे थे दवरल्या.
सोमार 15 एप्रीलाच्यान पालिकेन पे पार्कींग, सोपो करांत टीसीएस सयत जीएसटी कर 20 टक्के लागू गेल्लो. टॅक्सी स्टॅण्डा वयल्या चारचाकी वाहनां खातीर पे पार्किंगाचें शुल्क 20 रुपया वयल्यान 60 रुपया जाल्यार दुचाकींचें 10 वयल्यान 12 रुपया आनी 20 वयल्यान 24 रुपया केल्लें. तशेंच सरकाराच्या ऑक्टोबर 2020 चे अधिसुचोवणे प्रमाण सेनिटेशन फी च्या नांवान वेवसायिकांक सुमारा भायर कोयर कर लागू गेल्लो. सेनिटेशन कर हो ट्रेड लायसन्स परवान्या वांगडा तो लेगीत तीन वर्सांचे थकीत रकमे सयत घेवपाचो आदेश पालिका मुख्याधिकाऱ्यान कर्मचाऱ्यांक दिल्लो.
हो करवाडीचो निर्णय घेवचे खातीर पालिका मुख्याधिकारी चंद्रकांत शेटकार आनी लेखा तशेंच प्रशासकीय अधिकारी रिया नायक हांणी पालिका मंडळाक विस्वासांत घेवंक नाशिल्लें. पालिका मंडळाचे मंजुरी बगर हे कर माथ्यार थापून म्हापशेंकारांक व्हड धपको दिल्लो.
हें विशींची खबर कांय दिसां सावन ‘भांगरभूंय’न लावन धरिल्ली. पालिका मंडळा कडेन चर्चा करिनासतना तशेंच लोकसभा वेंचणुकेची आचारसंहिता लागू आसतना मुख्याधिकाऱ्यान घेतिल्ले. ह्या प्रकारा खातीर सत्ताधारी गटाक लोकांचे तिडकीक फुडो करचो पडटालो.
पे पार्किंगाचें शुल्क आदल्याच दरान वसूल करचें तशेंच सेनिटेशन फी हो कायर कर ट्रेड लायसन्स (वेवसाय परवानो) नुतनीकरणा वेळार घेवचो न्हय, असो आदेश सोमारा 22 एप्रीलाक सकाळीं मुख्याधिकारी शेटकार हांणी पालिका कर्मचाऱ्यांक दिला.
जर एकाद्याक नवो वेवसाय परवानो (ट्रेड लायसन्स) जाय जाल्यार त्या अर्जदारा कडल्यान परवानो फी वांगडा सेनिटेशन फी हो कोयर कर घेवपाचे निर्देश लेगीत मुख्याधिकाऱ्यान दिल्यात. ताका लागून पालिका मंडळाचे मंजुरे बगर ह्या कर वसुलीची कार्यवाही पालिके कडल्यान बेकायदो तरेन चालूच उरतली, हें स्पश्ट जालां.
घेतिल्ले पयशे परतून मेळटले?: वेवसायीक
पालिकेन सेनिटेशन फी म्हणल्यार कोयर कर वसूल करपाचो निर्णय फाटीं घेतला. पूण फाटल्या सप्तकभरांत वेवसायिकांनी सेनिटेशन फीच्या नांवा खाला लाखांनी रुपयांची रकम म्हापशें पालिकेंत जमा केल्या. ती रकम पालिका मंडळा कडल्यान परतून मेळटली व्हय, असो प्रस्न वेवसायिकांनी उपस्थीत केला.
मुख्याधिकारी मनमानी निर्णय घेताः नगरसेवक
सोमारा 22 एप्रीलाक नगराध्यक्ष डॉ. नूतन बिडोलकार हांचे अध्यक्षते खाला नगरसेवक, मुख्याधिकारी आनी पालिका कर्मचाऱ्यांची बसका जाली. हे कर वाडीक नगरसेवकांनी खर विरोध केलो. ही कर वाड बेकायदो आनी लोकांचेर अर्थीक वजें आसा. पालिका मुख्याधिकारी मनमानी तरेन निर्णय घेता, असो आरोप ह्या वेळार केलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
