भांगरभूंय | प्रतिनिधी
दिवचल: दिवचल मतदारसंघांत मेणकुरें धुमासे पंचायत वाठारांतल्या मेणकुरें गांवांत स्थायीक आशिल्ल्या आंदुर्लेकार कुटुंबांतल्या एका मनशाक मरण आयले उपरांत ताचे कुडीचेर परंपरीक सुवातेंत एकल्यान सुवातेच्या मालकीचो दावो सांगिल्ल्यान गांवांत तणावाचें वातावरण निर्माण जालें. परिस्थिती हाताभायर वचची न्हय हे खातीर मामलेदार, पुलिसांकूय आपयलें. तरी लेगीत सुवातेच्या धनयान आपले सुवातेंत निमाणे संस्कार करून दिले नात. निमाणें एकल्यान आपले खाजगी सुवातेंत निमाणे संस्कार करपाची परवानगी दिल्ल्यान वातावरण निवळ्ळें.
मजगतीं, हे घडणुकेक लागून मेणकुऱ्यां भौशीक मसंडभुंयेचे मागणेन नेट धरला. सरपंच गुरुदास परब हांणी सुवाते खातीर देवस्थान समिती आनी धुमासे कोमुनिदादी कडेन चर्चा करतलों अशें सांगलें.
मेणकुरें गांवांत भौशीक मसंडभूंय ना. कोणाकूय मरण येत जाल्यार दरेक जाण आपले खाजगी सुवातेंत कुडीचेर निमाणे संस्कार करतात. ह्या गांवचे म्हाजन आशिल्ल्या आंदुर्लेकार कुटुंबा खातीर अशी आरक्षीत सुवात ना. एक सुवात आशिल्ली, ताचेर आतां मेरेन ह्या कुटुंबांतल्या कोणाकूय मरण येत जाल्यार निमाणे संस्कार करताले. पूण हे सुवातेर दावेदारी सांगपी मनशाच्या नांवार न्यायालया वतीन सदर सुवात जाल्ल्यान त्या आदेशा प्रमाण संबंदीत व्यक्तीन ते सुवातेंत निमाणे संस्कार करपाक मज्जाव केलो.
ताका लागून गांवांतलें वातावरण तणावाचें जालें. मामलेदार राजाराम परब, पुलीस निरिक्षक राहूल नायक पुलीस पंगडा सयत मेणकुऱ्यां दाखल जाले. गांवांतले लोकूय जमले. पूण सुवात धनी आपल्या निर्णया कडेन ठाम राविल्ल्यान निमाणे संस्कार खंय करप हो प्रस्न उप्रासलो. निमाणें एका थळाव्यानूच आपले सुवातेत निमाणे संस्कार करपाची परवानगी दिल्ल्यान दनपार मेरेन ते कुडीचेर निमाणे संस्कार जाले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
