भांगरभूंय | प्रतिनिधी
सोमारा नगराध्यक्ष वेंचपा खातीर जातली बसका
वास्को: मुरगांव नगराध्यक्षपदा खातीर जावपी वेंचणुके खातीर प्रभाग क्रमांक 25चे नगरसेवक लिओ रॉड्रिगीश हांणी आपलो उमेदवारी अर्ज भरलो. उमेदवारी अर्ज भरपाची निमाणी तारीख 26 (आयतार) आसा. दनपारां 12 वरां मेरेन अर्ज स्विकारतले. 27 (सोमारा) तारखेक नवो नगराध्यक्ष वेंचपा खातीर खाशेली बसका जातली. ह्या वेळार वेंचणूक अधिकारी म्हूण मुरगांवचे उपजिल्होधिकारी रवीशंकर निपाणीकर हाजीर रावतले.
मुरगांवचे नगराध्यक्ष दामोदर कासकार हांणी आपल्या नगराध्यक्षपदाचो राजिनामो 13 जूनाक दिल्लो. ताका लागून नवो नगराध्यक्ष वेंचपा खातीर सोमारा खाशेली बसका आपयल्या. नगराध्यक्षपदा खातीर लिओ रॉड्रिगीश हांचे नांव पालिकेंतल्या सत्ताधारी भाजपा गटा वतीन जाहीर केलां. ते प्रमाण तांणी आपलो उमेदवारी अर्ज दाखल केला.
मुरगांव पालिका मंडळाचे 25 वांगडी आसात आनी सत्तधारी गटाचे 16 जाल्यार विरोधी गटाचे 9 वांगडी आसात. सत्ताधारी गटाचे संख्याबळ पळयत जाल्यार रॉड्रिगीश हांचें जैत निश्चीत आसा. तांकां मंत्री मॉवीन गुदिन्हो, आमदार कृष्णा साळकार, आदले आमदार मिलिंद नायक हांचें समर्थन आसा. रॉड्रिगीश हाचे पयली मुरगांव मतदारसंघांतल्या प्रभाग णवांतल्यान नगरसेवक म्हूण वेंचून आयिल्ले. फाटले वेंचणुकेंत ते दाबोळी मतदारसंघांतल्या प्रभाग क्रमांक 25 सांतल्यान वेंचून आयिल्ले. ते खातीर तांकां आदले नगराध्यक्ष क्रितेश गांवकार हांणी व्हड मजत केल्ली.
विरोधी गटा कडेन फक्त णव जाणांचें संख्याबळ आशिल्ल्यान ते नगराध्यक्ष वेंचणुकेंत आपलो उमेदवार उबे करतले काय वेंचणुके पसून पयस रावतले हें अजून स्पश्ट जाल्लें ना. णव मदले सात जाण आदले आमदार कार्लुस आल्मेदा हांचे समर्थक आसात. जाल्यार दोग जाण आमदार संकल्प आमोणकार हांचें समर्थक आसात. ताका लागून काँग्रेस पक्षा कडेन संलग्न आशिल्ले ते णव जाण लिओ रॉड्रिगीश हांकां तेंको दितले, काय ना हाचे कडेन वास्कोकारांचें लक्ष लागलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
