भांगरभूंय | प्रतिनिधी
नवी दिल्ली, खबरां संस्था ः मीठ हो आहारांतलो एक म्हत्वाचो घटक. चडशा जेवणांत मीठ वापरतात कारण ताका लागून जेवणाची रुच वाडटा. ते भायर कुडीक फावो त्या प्रमाणांत मिठाचीय गरज आसता. पूण, मीठ कितलेंय बरें आसलें तरी तें चड प्रमाणांत सेवन करप भलायकेक हानीकारक थारता. पूण मिठाचे वेगवेगळे पर्याय सेवन केल्यार उच्च रगतदाब नियंत्रीत करपाक मजत जाता अशें एका अभ्यासांतल्यान दिसून आयलां. चीनी शास्त्रज्ञांनी हलींच्या काळांत केल्ल्या अभ्यासांत मिठाच्या बदलाक मिठाच्या पर्यायांचो वापर केल्यार हायपोटॅन्शन (उणो रगतदाब) जावपाचें प्रमाण वाडनासतना उच्च रक्तदाब 40 टक्क्यांनी उणो जाता अशें दिसून आयलां. मिठाच्या पर्यायां मदीं २५ टक्के पोटॅशियम क्लोरायड आसता, जाका लागून रगतदाब वाडना.
मिठाचे पर्याय खंयचे आनी ते मिठा परस कशे वेगळे आसात?
मिठाचे पर्याय म्हळ्यार वेगवेगळे प्रकारचे मसाले. दिसपट्ट्या जेवणांत मिठाच्या बदलाक वेगवेगळे प्रकारचे मसाले वापरूं येतात. सगळ्यांत चड प्रमाणांत रूच दिवपी पदार्थ म्हळ्यार पोटॅशियम क्लोरायड. पूण कांय ब्रँडांनी ताचे बदला पोटॅशियम बायकार्बोनेट, पोटॅशियम सायट्रेट वा पोटॅशियम लॅक्टेट वापरतात. सोडियमाक लागून रगताचें प्रमाण आनी रगतदाब वाडटा, जाल्यार पोटॅशियम रगतदाब उणो करपाक आनी नियंत्रीत करपाक मजत करता. देखून सोडियम उच्च रगतदाबाचो परिणाम आडायता वा ताका आळाबंदा हाडटा. वखदी वनस्पत, मसालो, लसूण आनी लिंबू फळां सारकिल्ले घटक वापरून मिठाचे कांय नवे पर्याय उपलब्ध करपाक लागल्यात.
सोडियम उणें केल्यार आनी त्याच वेळार पोटॅशियम वाडयल्यार उच्च रगतदाब प्रभावीपणान उणो जाता अशें अभ्यासांतल्यान दिसून आयलां. खास करून सोडियमाची संवेदनशीलताय आशिल्ल्या लोकांक हे फायद्याचे. पूण मूत्रपिंड संबंदीत दुयेंसां आशिल्ल्या वा कांय प्रकारचीं वखदां घेवपी लोकांक मीठ फायद्याचें ना. कारण चड पोटॅशियम तांकां धोक्याचे थारूंक शकता. ते भायर उच्च रगतदाब वेवस्थापन येवजणेचो एक भाग म्हूण मीठ खावपी मनशान व्यायाम, वजन उणें करप आनी समतोल आहार अशा जिणे पध्दतींतल्या बदलांचेर लक्ष केंद्रीत करचें. पूण, ताचे परिणाम दरेकल्याक वेगवेगळे आसतात. देखून आहारांत मिठाच्या पर्यायाचो आस्पाव करचे पयलीं दोतोराचो सल्लो घेवप म्हत्वाचें.
मीठ कोणे खावचें?
उच्च रगतदाब आशिल्ले सुमार 75 टक्के लोक 55 वर्सां वयर सोडियम संवेदनशील व्यक्ती आसतात. उच्च रगतदाबाचो कुटुंबीक इतिहास आशिल्ल्या लोकां खातीर 50 वर्सां वयर आशिल्ल्या लोकांक उच्च रगतदाब जावपाचो धोको उणो करपा खातीर मिठाचे सेवन करप हो एक बरो पर्याय आसूं येता. वरिश्ठ (पिराय 65 वयर) लोक काळजाचो आताक येवपाची स्थिती आडावपाक तांचो वापर करूंक शकतात.
सामान्य रगतदाब आशिल्ल्या लोकांक हो पर्याय वेंचपाची गरज ना. भौशीक भलायकी मार्गदर्शक तत्वां प्रमाण, निरोगी प्रौढाक डब्ल्यूएचओन सुचयल्ल्या प्रमाण मनशाचें दिसपट्टें मीठ फकत पांच ग्राम म्हळ्यार फकत एक चमचो आसप गरजेचें. ताचे परस चड मीठ कुडीक धोक्याचे थारता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
