भांगरभूंय | प्रतिनिधी
आमदार प्रेमेंद्र शेट हांचे हाजेरींत जाली बसका
दिवचल: मयें वाठारांत साळगांवकार कंपनीन नवी खण लिजार घेतल्या. हेच फाटभूंयेर खण वेवसाय सुरू करतना शेतकारांचे, कामगारांचे, ट्रक धनी तशेंच गांवकारांचे सगले प्रस्न सोडोवन ते विशीं योग्य निर्णय घेवन तोडगो काडचो. उपरांतूच हेर गजाली पुराय करच्यो, अशें उपजिल्लोधिकारी कार्यालयांत आयोजीत खण वेवस्थापन, शेतकरी, ग्रामस्थ, पंचायत मंडळ आनी आमदार हांचे जोड बसकेंत थारलें.
आदीं चौगुले कंपनी कडेन ही खण आशिल्ली. आतां साळगांवकर कंपनीन ती घेतल्या. अजून पंचायती कडल्यान दाखलो मेळूंक ना. शेतकारांचे जायते प्रस्न तशेच आसात. हे विशीं शेतकारांनी आपली भुमिका मांडटना, सगळे प्रस्न पयलीं सोडयात अशी मागणी केल्ल्याचें शेतकार संघटनेचे सखाराम पेडणेंकार हांणी सांगलें.
‘पंचायतीक सगळे तरेचें सहकार्य करप, ट्रक धनयांचे प्रस्न सोडोवप तशेंच कंत्राटी पद्धतीचेर ट्रक घेनासतना कंपनीन ते सरळ घेवप गरजेचें. थळाव्यांक रोजगार, कंत्राटां आनी थळाव्या ट्रक धनयांक प्राधान्य दिवपाची मागणी पंचायतीचे वतीन सरपंच कृष्णा चोडणकार हांणी केली.
पंचायतीक विस्वासांत घेवनूच कंपनीन परवान्यां खातीर कायदेशीर सोपस्कार करचे अशें ह्या वेळार थारलें.
शेतकारांक ह्यान पयलीं दिल्ली अर्थीक मजत थकिल्ल्यान ती दिवची. कामगारांचे प्रस्न सोडोवचे, आदल्या कामगारांक नवे कंपनीन कामाक घेवचे, अशे तरेची मागणी आमदार प्रेमेद्र शेट हांणी केली.
ह्या वेळार कंपनीचे अधिकारी तशेंच शेतकरी, पंचायत मंडळाचे पदाधिकारी, ट्रक मालक संघटनेचे पदाधिकारी आनी ग्रामस्थ आनी कामगार हजर आशिल्ले.
बसके उपरांत प्रतिक्रिया उक्तायतना आमदार शेट हांणी सांगलें, आमी उपजिल्लोधिकार्यांचे हाजेरींत खण वेवस्थापनाक सगळ्यो मागण्यो सादर केल्यात. कंत्राट तशेंच वेगवेगळ्या स्वरूपांत गांवकारांक कशे तरेन फायदो जातलो, हे विशीं कंपनीन विशेश लक्ष दिवपाचो उलो तांणी मारलो आनी ही बसका प्रस्न सोडोवपा खातीर आपयल्ली अशें तांणी सांगलें. जिल्लोधिकारी रोहन कासकार हांणी लोकांचें म्हणणें समजून घेवन ते विशीं अहवाल तयार करपाचे आदेश दिले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
