भांगरभूंय | प्रतिनिधी
थारायिल्ल्या नेमा प्रमाण त्यो चालीक लायतले
मुंबय, खबरां संस्था ः मराठा आरक्षणाच्या मुद्याचेर मंत्री दीपक केसरकार हांणी मनोज जरांगेच्यो सगळ्यो मागण्यो मान्य केल्यात अशी घोशणा केली. सरकारी शिश्टमंडळान आयज मनोज जरांगे कडेन चर्चा केली. ही चर्चा खूब सकारात्मक जाली. तांतूत तांच्यो सगळ्यो मागण्यो मान्य जाल्यो. आतां थारायिल्ल्या नेमा प्रमाण त्यो चालीक लावपाक लागतले अशें केसरकार हांणी सांगलें.
मंत्री दीपक केसरकार हांणी मिडिया कडेन उलयतना सांगलें, मनोज जरांगे पाटील संवेदनशील आसात. ते महाराष्ट्राच्या हिताचो विचार करतले. आतां मागण्यो मान्य जाल्यात. पूण, ताची अंमलबजावणी सरकारान थारायिल्ल्या नेमा प्रमाण जाता. पूण महाराष्ट्राच्या इतिहासांत पयलेच खेपे आमी आतां मेरेन 37 लाख कुणबी प्रमाणपत्रां जारी करपाक पावलां. आतां ही नवी प्रक्रिया पुराय जाले उपरांत हो आंकडो 50 लाखां वयर पावतलो. देखून हो न्याय मेळोवपाक मनोज जरांगे हांचो वांटो आसा. ते खातीर तांका हांव परबीं दितां.
मनोज जरांगे हांणी भान आनी मान दवरचो…
मुंबय ठप्प जावप देशाच्या नदरेन योग्य न्हय. मुख्यमंत्र्यान स्वता फुडाकार घेतलो आनी वेवस्था कामाक लायली. शेवटाक परंपरेक मान दिवप हीय राज्याची संस्कृताय जावन आसा. कितले अधिकारी मेळपाक गेले, कितले फुडारी मेळपाक गेले ताका कसलोच अर्थ ना. राज्य सरकार म्हळ्यार राज्य सरकार. सगळ्यो वेवस्था काम करतात हाचोय तांणी आदर करचो, आंदोलन फाटीं घेतले उपरांत मुख्यमंत्री, उपमुख्यमंत्री तांकां मेळून तांचे वांगडा उमेद मनयतले अशें केसरकार हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
