भांगरभूंय | प्रतिनिधी
मडगांव : मडगांव न्यू मार्केटांतल्या दुकानांतल्या चोरये उपरांत चोरांनी परतून दोन दुकानांनी चोरी केली. पद्मा फार्मसी आनी रेड कार्पेट रेस्टॉरंटांत चोरी जाली. चोरयांचे फाटभूंयेर पुलीस गस्त वाडोवपाची मागणी थळावे करतात. ह्या चार दिसांनी मडगांव पालिकेच्या न्यू मार्केटांत सुमार आठ दुकानांनी चोरी जाल्या.
नातलां आनी नव्या वर्साचे फाटभूंयेर पुलीस बंदोबस्त वाडोवन लेगीत चोरयेच्यो घडणुको घडतूच आशिल्ल्यान थळाव्यांनी तिडक उक्तायल्या.
हे विशीं मेळिल्ले म्हायती प्रमाण, सोमारा रातीं आकेंच्या पद्मा फार्मसी आनी रेड कार्पेट रेस्टॉरंटांत चोरयेची घडणूक उक्ताडार आयिल्ली. चोर फार्मसीच्या शटराचें कुलूप तोडून भितर सरले. फार्मसींत चड पयशे दवरूंक नाशिल्ले. ताका लागून चोरांच्या हातांक चड कांय लागलें ना. जाल्यार रेड कार्पेट रेस्टॉरंटांतलो एक मोबायल आनी कांय पयशे चोरांनी चोरले. फार्मसींतले सीसीटीव्हींत चोर दिसतात. पुलीस सीसीटीव्ही फुटेज, हाताचे ठशे हाचे वरवीं तपास करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
