मडकयच्या नवदुर्गा देवळांत पुजारी आनी गांवकारां मदीं वाद
भांगरभूंय | प्रतिनिधी
फोंडें, प्रतिनिधी ः मडकयच्या नवदुर्गा देवळांत सोमारा सकाळीं संप्रोक्षण नमी दिसा ओटी भरपाच्या वेळार तणाव निर्माण जालो. सनथ नायक आनी प्रतीक नायक हांणी आपल्याक मारिल्ल्याची कागाळ देवळाचे पुजारी विभव घैसास हांणी केले उपरांत मडकयच्या बायलांनी देवळाच्या पुजाऱ्यान आपणाक धक्काबुक्की केल्ल्याची कागाळ म्हाड्डोळ पुलिशेंत केली. परिस्थितीचेर नदर दवरपा खातीर पुलीस निरिक्षक योगेश सावंत आनी राघोबा कामत हांचे वांगडा हेर पुलीस घडणूक सुवातेर आशिल्लें.
पुलिसांनी दिल्ले म्हायती प्रमाण, सोमारा सकाळीं ओटी भरपाक देवळांत बायलांची गर्दी जाल्ली. त्या वेळार विभव घैसास हे पुजारी घरा वतना देवळा भायर ताका मारपेट जाली. उपरांत देवळा लागसार तणाव निर्माण जालो. पुलिसांनी विभव हांकां मडकय भलायकी केंद्रांत तपासणे खातीर व्हरून उपरांत घरा धाडले. मागीर गौरव घैसास हांणी घेतिल्ले पत्रकार परिशदेंत सांगलें : गांवच्या लोकांनी देवळांत एकठांय केल्ले सामान काडून घेवपाचो यत्न केलो. पुजाऱ्यान तांकां आडावपाचो यत्न केलो तेन्ना विभव हांकां मारपेट जाली. सनथ नायक आनी प्रतीक नायक हांणी मारिल्ल्याची कागाळ पुलीस स्टेशनांत केल्या. देवळाचे पुजारी नवदुर्गा देवीची मूर्त बदलपाक विरोध करून नवदुर्गा प्रतिष्ठानाक सहकार्य करतालो. पूण हेर गजालींक सहकार्य करनाशिल्लो, अशेंय गौरव हांणी सांगलें.
पुजाऱ्यान थळाव्या तरणाट्यां आड रितसर कागाळ केल्या उपरांत शंबरां परस चड थळाव्या लोकांनी पुलीस स्टेशनांत वचून सिंधुराज घैसास, श्रीदत्त घैसास आनी आदित्य घैसास हांणी रांकेत उबीं आशिल्ल्या बायलांक धक्को दिल्ल्याची म्हायती दिली. चड म्हायती दितना तांणी सांगलें, विशाखा गदंबी हे बायलेक ओटी भरपा खातीर रांकेंत उबी रावतना तीन पुजाऱ्यांनी धक्को दिलो. कारण देवळांत एकठांय केल्लें सामान काडपाक गेल्ल्या गांवच्या लोकां कडेन पुजाऱ्यांचो वाद जाल्लो. नवदुर्गाचें देवूळ पुजारी आनी महाजनाचें आशिल्ल्याचे ताणें सांगलें. गांवचे लोक तशेंच भक्त स्वताच्या खर्चान देवळाचो उत्सव मनयतात आनी देवळांतल्यान एकठांय केल्ले सामान व्हरपाचो केल्लो आरोप खरो न्हय अशेंय गांवकारांनी सांगलें
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
