भाजप – काँग्रेसचे उमेदवार करोडपती, आरजीचे लखपती

भांगरभूंय | प्रतिनिधी

पणजीः राज्यांत लोकसभेची रणधुमाळी सुरू जाल्या. प्रचार नेटान सुरू आसा. भाजप, इंडी आघाडी, आरजी आनी अपक्ष उमेदवारांनी आपले अर्ज भरल्यात. जायत्या जाणांनी प्रचाराच्या दुसऱ्यो आनी तिसऱ्यो फेरयो पुराय केल्यात. सगळेच पक्ष पुराय ताकदीन आपल्या उमेदवाराच्या प्रचारांत सक्रीय जाल्यात. एकामेकांचेर आरोप-प्रत्यारोप करप, केल्ल्या कामांचो हिशोब मागप हे प्रकार चालूूच आसात. प्रसार माध्यमांचेर लेगीत प्रचार तेंगशेर पावलां.

———–

उत्तर गोंयचे भाजपाचे उमेदवार श्रीपाद नायक हांची मालमत्ता

श्रीपाद नायक हांची मालतत्ता 2.5 कोटी आशिल्ल्याची म्हायती वेंचणूक अायोगााक सादर केल्ल्या प्रतिज्ञापत्रांत नमूद केल्या. तांच्या बँक खात्यांत 17,23,431 रुपया आसात. तशेंच 22,69,632 रुपयांचे बाँड्स, सुमार 3,11,144 रुपयांची बचत, 1,19,82,660 रुपयांची देयकां, 15,34,896 रुपयांची वाहनां, 6,90,204 रुपयांचे भांगर, हेर 19,35,424 रुपयांची मालमता मेळून 2 कोटी 5 लाख 67 हजार 672 रुपयांची मालमत्ता असल्याचे नायक हांणी प्रतिज्ञापत्रांत नमूद केलां.

—————-

दक्षीण गोंयची भाजपाची उमेदवार पल्लवी धेंपों हांची मालमत्ता

पल्लवी धेंपो हांची मालमत्ता सुमार 255.44 कोटी आशिल्ल्याचे वेंचणूक आयोगाक सादर केल्ल्या प्रतिज्ञापत्रांत नमूद केला. पल्लवी धेंपो हांच्या बँक खात्यांत सुमार 9.91 कोटी रुपया आसात. तशेंच सुमार 217.11 कोटींचे बाँड्स, 12.92 कोटींची बचत, 2.54 कोटींची वाहनां, 5.69 कोटींचे भांगर तशेंच हेर 9.75 कोटी रुपया मेळून तिचे कडेन 255.44 कोटींची मालमत्ता आशिल्ल्याचे धेंपो हांणी प्रतिज्ञापत्रांत नमूद केला.

—————

उत्तर गोंयचे काँग्रेसचे उमेदवार अॅड. रमाकांत खलप हांची मालमत्ता

अॅड. खलप हांच्या बचत खात्यांत 1.07 कोटी रुपया आसात. बाँड्स, म्युच्युअल फंड हातूंत तांची 45 लाख रुपयांची गुंतवणूक आसा. तांचे कडेन 3.60 लाखांची वाहनां आसात, जाल्यार 3.47 कोटींची स्थावर मालमत्ता आसा. तांची घरकान्न निर्मला खलप हिचे कडेन गुंतवणूक, बँक खातीं, भांगर मेळून 4.92 कोटी, जाल्यार 6.61 कोटींच्यो जमनी अशी 11.53 काेटींची मालमत्ता आशिल्ल्याचे प्रतिज्ञापत्रांत नमूद केला.

————-

उत्तर गोंयचेे काँग्रेसचे उमेदवार विरियातो फर्नांडीस हांची मालमत्ता

काँग्रेसचे दक्षीण गोंय उमेदवार कॅ. विरियातो फर्नांडीस हांचे कडेन 1 कोटी 95 लाख रुपयांची मालमत्ता आसा. जाल्यार तांची घरकान्न अनिता हांचे कडेन 3 कोटी 31 लाख रुपयांची मालमत्ता आसा. दोगांय कडेन मेळून सुमार 5.30 कोटींची मालमत्ता आसा. विरियातो हांणी वेंचणूक आयोगाक दिल्ल्या प्रतिज्ञापत्रांतल्यान ही म्हायती मेळ्ळ्या. तांणी बुधवारा दक्षीण गोंय जिल्होधिकाऱ्या कडेन उमेदवारी अर्ज दाखल केलो.

————-

उत्तर गोंयचे आरजीचे उमेदवार मनोज परब हांची मालमत्ता

आरजी पक्षाचे उत्तर गोंयांतले उमेदवार मनोज परब हांचे कडेन 3 लाख 12 हजार 469 रुपयांची मालमत्ता आसा. तांची घरकान्न विणा हाचे कडेन 1 लाख 80 हजार रुपयांची मालमत्ता आसा. परब हांणी वेंचणूक अायोगाक दिल्ल्या प्रतिज्ञापत्रांत ही म्हायती नमूद केल्या.

—————

दक्षीण गोंयचे आरजीचे उमेदवार रुबर्ट परेरा हांची मालमत्ता

आरजीचे दक्षीण गोंयचे उमेदवार रुबर्ट परेरा हांची मालमत्ता 27,63,636 इतली आसा. रुबर्ट हांचेर 5 लाखांचें रीण आशिल्ल्याची म्हायती तांणी आपल्या प्रतिज्ञापत्रांत दिल्या.