भांगरभूंय | प्रतिनिधी
विश्वजीत राणेः काँग्रेसींत आसतनाय प्रतापसिंह राणे हांणी श्रीपाद नायकांकूच तेंको दिल्ल्याचो दावो
भांगरभूंय । प्रतिनिधी
पणजीः आपलो बापूय प्रतापसिंह राणे आनी श्रीपाद नायक हांचे नातें वेगळें आसा. काँग्रेसीत आसतना लेगीत प्रतापसिंह राणे हांणी लोकसभा वेंचणुकेंत श्रीपाद नायक हांकांच तेंको दिल्लो, अशें भलायकी मंत्री विश्वजीत राणे हांणी सांगलें.
बुधवारा पणजे घेतिल्ले पत्रकार परिशदेंत विश्वजीत राणे उलयताले. ह्या वेळार आमदार केदार नायक आनी भाजप सरचिटणीस दामोदर नायक उपस्थीत आशिल्ले.
राणे हांणी सांगलें, आपूण कालूच आपल्या बापाय वांगडा उलयतालों. त्या वेळार तांणी आपूण काँग्रेसींत आसतना श्रीपाद नायक हांकां तेंको दिल्लो, अशें सांगलें. तेच खातीर सत्तरी म्हालांतल्यान श्रीपाद नायक हांकां मतांची आघाडी मेळ्ळी. हे खेपे लेगीत गोंयचे उदरगती खातीर आपलो तेंको श्रीपाद नायक हांकांच आसतलो, अशेंय तांणी स्पश्ट केलें. तेच खातीर हे वेंचणुकेंत श्रीपाद नायक हांकां सत्तरींतल्यान सगळ्यांत चड मतांची आघाडी मेळटली, असो आपल्याक विस्वास आसा.
आपलो बापूय मुख्यमंत्री आसतना तांणी गोंयांत उदरगतीचीं कामां केलीं. तांणी केल्ल्या कामांची छाप अजून लेगीत गोंयाचेर आसा. तांणी केल्ल्या कामांक लागून तांचे अजून लेगीत देशाच्या नेतृत्वा कडेन बरे संबंद आसात. मात तांणी एक काँग्रेस फुडारी म्हूण न्हय जाल्यार प्रतापसिंह राणे म्हूण गोंयची उदरगत केली. आदीं प्रतापसिंह राणे आशिल्ले, काँग्रेस पक्ष उपरांत, अशें राणे हांणी सांगलें. विरोधक स्मार्ट सिटीच्या कामांचेर कॅगान बडी मारिल्ल्याचें सांगतात. तांणी कॅगाचो हो संदर्भ आपल्याक दाखोवचो. तो नासत जाल्यार ताचेर चर्चा करून उपेगाची ना. विरोधकांक जाय जाल्यार तांणी कॅगाक पत्र बरोवन चवकशेची मागणी करची. कॅग अहवाल ऑडीट आनी हेर गजाली तपासता. घडये तातूंत कसल्यो तरी तांत्रीक आडखळी आयल्या आसतल्यो. हे संबंदांत मुख्यमंत्री डॉ. प्रमोद सावंत हांणी स्वता लक्ष घातलां. तांणी विवीध खात्यांक सुचोवण्यो केल्यात, अशें राणे हांणी सांगलें.
‘जाय जाल्यार सरदेसाय हांणी न्यायालयांत वच्चें’
फोंडेंच्या सरकारी हॉस्पिटला संबंदांत विजय सरदेसाय हांणी न्यायालयांत वतलो, अशें म्हणिल्लें. हाचेर राणे हांणी सांगलें, एके वटेन सरदेसाय मडगांवच्या पब्लीक प्रायव्हेट हॉस्पिटलाक विरोध करता आनी दुसरे वटेन न्यायालयांत वचपाच्यो गजाली करतात. तांकां जाय जाल्यार तांणी न्यायालयांत वच्चें.
मनोज परबाक वळखना: विश्वजीत राणे
मनोज परब नांवाच्या खंयच्याच मनशाक आपूण वळखना. ताचें नांव आपूण पयलेच खेपे आयकतां. आपले आड वेंचणूक लडोवप्यांची वळेरी लांब आसता, ते वळेरेंत लेगीत तें नांव आपूण पळयना, अशें विश्वजीत राणे हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
