भांगरभूंय | प्रतिनिधी
भांगरभूंय । प्रतिनिधी
गुळेलीः नवचेतना प्रगती मंच वांतें- सत्तरी हे सामाजीक संस्थेचो अध्यक्ष नितीन शिवडेकार हांण आपल्या घरा लागीं आशिल्लें सोऱ्याचें बार बंद करून ते सुवातेर नवचेतना प्रगती मंच वाचपघर सुरू केलां. तांच्या ह्या समाजाभिमुख उपक्रमाची सत्तरी तालुक्यांत तुस्त- तोखणाय जाता.
वाचपघराचें उक्तावण हालींच जालें. ह्या वेळार मुखेली सोयरी म्हणून अडवयच्या सरकारी माध्यमीक विद्यालयाची मुख्याध्यापिका आजरा अन्सारी हाजीर आशिल्ली. तशेंच साखळेच्या प्रोग्रेस विद्यालयाची शिक्षिक आनी समाज वावुरपी सौ दया संजय तेंडुलकार मुखेल उलोवपी म्हणून हाजीर आशिल्ली. वांते वाठारांतली डॉ यशवंती गावडे, शांबा गावडे, विद्यालयाच्या पालक- शिक्षक संघाचे अध्यक्ष महादेव गावडे हाजीर आशिल्ले.
भुरग्यांची सर्वांगी उदरगत जावपाची गरज आसा. ते खातीर वाचन सामकें म्हत्वाचें आसा. शारांनी वाचपघऱां आसतात. गांवगिऱ्या वाठारांनी ती वेवस्था आसना. शिवडेकार हांणी बार्र बंद करून वाचपघर सुरू करप ही खऱ्यांनीच एक क्रांती म्हणपाक जाय अशें आजरा अन्सारी हांणी सांगलें.
समाजा खातीर कितें तरी वेंगळें करपाचो ध्यास काय वेचीक लोक बाळगितात. तातूंत शिवडेकार हांचो आसपाव जाता. तांच्या यत्नांत बार्राचें वाचपघर जाला. ताचो लाब गांवगिऱ्या वाठारांतल्या विद्यार्थ्यांक जातलो. नवचेतना प्रगती मंचा वतीन चालीक लायतात ते वेगळे उपक्रम हेरांक प्रेरणा दितले अशें दया तेंडुलकार हिणे सांगलें.
जे सुवातेंत वाचपघर सुरू केलां थंय म्हजा आज्यान सुरू केल्लें सोऱ्याचें दुकान आशिल्ले. तें बंद करून हावें वाचपघर सुरू केला. कला आनी संस्कृती खात्याच्या वाचपघर येवजणेचो लाब घेवन हें वाचपघर सुरू केलां. कला आनी संस्कृती मंत्री गोविंद गावडे हांचें ते खातीर खासा सहकार्य मेळ्ळां अशें नितीन शिवडेकारान सांगलें.
सुरवेक मानेस्तांचे हस्तुकीं फीत कापून वाचपघराचें उक्तावण केलें. सूत्रसंचालन वर्षा गावडे हिणे केलें जाल्यार प्रदीप गावडे हांणी उपकार मानले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
