भांगरभूंय | प्रतिनिधी
उसगांवां रस्त्यार भरलें उदक; तीन दुचाकी चालक रस्त्यार पडून जखमी
फोंडें: फोंडें म्हालांत बिरेस्तारा सकाळ सावन उटंगाराचो पावस पडलो. ताका लागून विवीध सुवातांनी रस्त्यार उदक भरिल्ल्याचें दिसून आयलें. खास करून उसगांव वाठारांतल्या रस्त्यार उदक व्हड प्रमाणांत दिसून आयलें. उदकाचो अदमास येवंक नाशिल्ल्यान तीन दुचाकी चालक रस्त्यार पडून किरकोळ जखमी जाले.
फोंडें वाठारांत बिरेस्तारा पडिल्ल्या पावसाचें उदक रस्त्यार उरिल्ल्यान वाहन चालकांची धांदळ जाली. खास करून खांडेपार आनी उसगांव वाठारांतल्या रस्त्यार उदक भरून व्हांवूंक लागलें. उसगांव वाठारांतल्या गटारांची नितळसाण करूंक नाशिल्ल्यान उदक रस्त्यार सांचून उरता. ताका लागून वाहन चालकांक रस्त्या वयल्या फोंडकुलांचो अदमास येना.
खांडेपार पूल ते तिस्क-उसगांव आनी तिस्क-उसगांव ते उसगांव मेरेनच्या रस्त्या वयल्यान व्हड प्रमाणांत उदक व्हांवन वता. केळींनी-उसगांव हांगा तर तांबड्या रंगाचें उदक रस्त्या वयल्यान दीसभर व्हांवत आशिल्ल्याचें दिसून आयलें. नॅस्ले कंपनी कुशीक लेगीत रस्त्या वयल्या उदकांतल्यान वाहनां काडपाची वेळ चालकांचेर आयली. केळींनी आनी उसगांव वाठारांत रस्त्यार उदक भरिल्ल्यान फोंडकुलांचो अदमास येवंक नाशिल्ल्यान तीन दुचाकी चालक पडून किरकोळ जखमी जाल्ल्याची खबर आसा.
मजगतीं, वेलकास-सावयवेरें हांगा दनपारां विजेच्या सरयां सयत रस्त्यार झाड पडलें. फोंडें उजो पालोवपी दळाचे कचेरेक म्हायती मेळटकूच कर्मचाऱ्यांनी घडणूक थळार वचून रस्त्या वयलें झाड कुशीक काडलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
