भांगरभूंय | प्रतिनिधी
मुख्यमंत्री : आयुष वेलनेस केंद्राचें उक्तावण
भांगरभूंय । प्रतिनिधी
पणजी : गोंयांत कॅन्सर, गोडेमूत, किडनी, फिग्दा संबंदांतल्या दुयेंसांचें प्रमाण वाडत आसा. चड करून दुयेंत जाले उपरांत उपचार घेतात, मात दुयेंत जावचेच न्हय हे खातीर आयुष पद्दती ही एक बरी उपचार पद्दती आसा, अशें मुख्यमंत्री डॉ. प्रमोद सावंत हांणी सांगलें.
बिरेस्तारा सचिवालयांत आयुष वेलनेस केंद्राच्या उक्तावणा वेळार मुख्यमंत्री उलयताले. ह्या वेळार भलायकी मंत्री विश्वजीत राणे, मुख्य सचीव व्ही. कांदावेलू, सचीव यतिंद्र मरळकर, डॉ. मिनल जोशी उपस्थीत आशिल्ली.
मुख्यमंत्र्यान सांगलें, प्रतिबंधात्मक भलायकी तपासणी, भलायकी सेवांचेर भर दिवपा खातीर आयुष वेलनेस केंद्र सुरू केलां. आयज उक्तावण केल्ल्या आयुष वेलनेस केंद्राचो फायदो सचिवालयांतल्या कर्मचाऱ्यांक जातलो. कर्मचाऱ्यांनी आयुर्वेदांत सांगिल्ले प्रमाण आपली भलायकी समजून घेवची. योग, प्राणायम पद्दती लेगीत शिकून ताची आपले जिणेंत अंमलबजावणी करची. कर्मचारी शारिरीक आनी मानसीक नदरेन तंदुरुस्त उरचे हे खातीर आमी हें केंद्र सुरू केलां. सचिवलया भायर हांगा कामा खातीर येवपी हेर सरकारी कर्मचाऱ्यांक ह्या केंद्राचो लाव घेवपाक मेळटलो. हांगा सकाळीं 10 ते सांजेच्या 5 वरां मेरेन आयुष दोतोर उपलब्ध आसतले. गरज पडली जाल्यार हेर उपचार पद्दतींचे दोतोर लेगीत आपयतले. गोंय सरकारान टाटा कॅन्सर संशोधन हॉस्पिटला वांगडा समजिकायेची कबलात केल्या. ते प्रमाण मुळावें भलायकी केंद्र तशेंच जीएमसींत बेगिनूच आयुष ओपीडी सुरू करपाचो आमचो यत्न आसा, अशें मुख्यमंत्र्यान सांगलें.
गोंयभरांत 28 केंद्रांची सुरवात : भलायकी मंत्री
मुख्यमंत्री डॉ. सावंत हांच्या फुडारपणान गोंयभरांत 28 आयुष केंद्रा हे आदींच सुरू केल्यांत. फाटल्या कांय वर्सांत गोंयान भलायकी मळार उड्डाण घेतलां. नव्या हॉस्पिटलांचीं उक्तावणां जातात. आधुनीक भलायकी सेवा, सुविधा दिवपाक गोंय देशांत सगल्यांत मुखार आसा, अशें भलायकी मंत्री विश्वजीत राणे हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
