भांगरभूंय | प्रतिनिधी
मशिनरी, जनरेटर जप्त; खण आनी भूगर्भ खात्याची कारवाय
वाळपय: सत्तरी म्हालांतल्या पिसुर्लें गांवांत व्हड प्रमाणांत चिऱ्या खणीचे संख्येंत वाड जावंक लागल्या. हाची खाशेली दखल घेवन खण आनी भूगर्भ खात्याचो पंगड आनी सत्तरी म्हालाचे जोड मामलेदार विष्णू राणे हांणी जोड रितीन धाड घालून चिरे कापपाचें मशीन आनी जनरेटर जप्त केलो. हे विशीं संबंदीत जमीन धनयाचेर गुन्यांव दाखल करून फुडली कारवाय सुरू आशिल्ल्याची म्हायती गोपां कडल्यान उपलब्ध जाल्या.
पिसुर्लें पंचायत वाठारांत हालींच्या दिसांनी चिऱ्या खणीच्या वेवसायांत गतीन वाड जाल्या. खूबशा सुवातांनी सरकारी जमनी आसात. थंय लेगीत चिऱ्या खणी सुरू आसून हे विशींच्यो कागाळी करून लेगीत सरकाराची यंत्रणा हाचे कडेन आडनदर करीत आशिल्ल्याचो आरोप जायत आशिल्लो.
हे विशींच्यो खूबश्यो कागाळी आतां मेरेन खण आनी भूगर्भ खात्या कडेन आयिल्ल्यो. पूण हाची विशेश दखल घेनाशिल्ले. पूण दोन दिसां पयलीं खण खात्याच्या पंगडान सत्तरी म्हालाचे जोड मामलेदार विष्णू राणे हांचे हाजिरेंत धाड घालून चिरें कापपाचें मशीन आनी जनरेटर जप्त केलो. जंय ही धाड घाली थंय कामगार नाशिल्ले. पूण थंय आशिल्ली मशिनरी आनी जनरेटर ताब्यांत घेतलो.
मजगतीं, ह्या संदर्भांचें सर्वेक्षण सुरू आसा आनी ज्या जमीन धनयाचे सुवातेंत हे बेकायदो चिऱ्या खणीचो वेवसाय सुरू आशिल्लो ताचेर फौजदारी गुन्यांव दाखल करतले अशी म्हायती संबंदीत गोपां कडल्यान मेळ्ळ्या.
मजगतीं, खण आनी भूगर्भ खात्या कडेन संपर्क सादलो तेन्ना हे विशींची कागाळ पुलीस स्टेशनार दाखल केल्या. ते विशींची चवकशी सुरू आसा. पूण सद्या तरी मशिनरी ताब्यांत घेवन थंय पुलीस बंदोबस्त दवरला.
अचकीत पडिल्ले धाडीक लागून लागसारच्या चिऱ्या खणीच्या वेवसायाचेरूय हाचो परिणाम जाला. सद्या तरी धाड घालून ही कारवाय केल्या. वाठारांतलो वेवसाय बंद आसा. पूण आठ दिसां उपरांत तो निश्चीतपणान परतून सुरू जातलो अशी चर्चा ह्या वाठारांतले लोक करतात.
पिसुर्लें वाठारा बरोबरूच हेर वाठारांनी लेगीत व्हड प्रमाणांत वेवसाय सुरू आसा. पूण ह्या वाठारांत धाड घालून कारवाय करपाचें धाडस अजून मेरेन सत्तरी म्हालांतल्या संबंदीत अधिकाऱ्यांक आनी खण खात्याच्या अधिकार्यांक जाल्लें ना. हाका लागून खूबशा वर्सां सावन हो वेवसाय बिनधास्तपणान सुरू आशिल्ल्याची म्हायती मेळ्ळ्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
