भांगरभूंय | प्रतिनिधी
काणकोण: समाज माध्यमांचेर वेब पेज चलाेवपी बासुरी देसाय ह्या पत्रकारान आपल्या सोऱ्याच्या वेवसाया संबंदी फटीची बातमी प्रसारीत करून बदनामी केली. हे विशींची कागाळ धुल्लगाळ शेळी हांगासरले डॉरेटी डिसोझा हांणी केल्ली. ह्या कागाळीची दखल घेवन काल (बुधवारा) दोनूय वटेनच्या लोकांक काणकोण पुलिसांनी चवकशे खातीर पुलीस स्टेशनार आपयिल्ले. पूण बासुरी देसाय गैरहाजीर रावल्यो.
काल काणकोण पुलिसांनी खंडणी, बदनामी करप, घराचे भोंवतणी भोंवड्यो मारप हे संबंदी बासुरी देसाय आनी रुचिका दळवी हांचे आड एफआरआय दाखल केल्ल्याची म्हायती काणकोचे पुलीस निरिक्षक चंद्रकांत गांवस हांणी दिली.
काल डॉरेटी डिसोझा हांचे वकील अश्लेशा नायक गांवकार तशेंच लिगोर डिसोझा, रॉय सिल्वा, सांतान कॉस्ता हांचे सयत शंबर परस चड लोक काणकोण पुलीस स्टेशनार जमिल्ले.
आपल्याचेर नोंद जाल्ल्या कागाळी संबंदी पत्रकार बासुरी देसाय हांणी उजवाडायिल्ल्या पत्रकांत म्हणलां की, म्हजो कायद्याचेर पुराय विस्वास आसा आनी म्हाकाच न्याय मेळटलो. अशें सांगून हाचे मुखारूय हांव पत्रकार ह्या नात्यान वायट कृत्याचेर आवाज काडटलें अशें म्हणलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
