भांगरभूंय | प्रतिनिधी
आयनॉक्सा कडेन सेरेंडिपिटी फेस्टिव्हला खातीर उबारिल्लें तात्पुरतें बांदकाम
पणजी: पणजेंतल्या आयनॉक्स थिएटरा कुशीक उबारिल्ल्या तात्पुरत्या लांकडी बांदकामाक उजो लागपाची घडणूक आयतारा घडली. पणजे शारांत 15 डिसंंबरा सावन सुरू जावपी सेरेंडिपिटी आर्ट्स फेस्टिव्हल 2024 हे खातीर तात्पुरत्या लांकडी बांदकामाक उजो लागिल्ल्यान लाखांनी रुपयांचें लुकसाण जालें. प्रसंग वळखून आयनॉक्साच्या कर्मचाऱ्यांनी रोखडेंच उजो पालोवपाचें काम सुरू केल्ल्यान व्हडलो अनर्थ टळ्ळो. उपरांत उजो पालोवपी दळान उज्याचेर नियंत्रण मेळयलें.
पणजी उजो पालोवपी दळान दिल्ले म्हायती प्रमाण आयनॉन्स थिएटरा कुशीक उबारिल्ल्या तात्पुरत्या लांकडी बांदकामाक उजो लागिल्ल्याची म्हायती काल (आयतारा) सांजे 4.37 वरांचेर दळाच्या नियंत्रण कक्षाक मेळ्ळी. उपरांत ही म्हायती पणजी उजो पालोवपी दळाक दिली.
पणजी उजो पालोवपी दळाचे स्टेशन फायर ऑफिसर दिलीप गांवस हांच्या मार्गदर्शना खाला उपअधिकारी सुभाष नायक हांच्या फुडारपणा खाला ड्रायव्हर ऑपरेटर जितेंद्र मयेंकार, फायर फायटर सतीश मोदीकर, गितेश फडते आनी हेर जवानांनी घडणूक थळार धांव घेतली. रोखडेंच उज्याचेर उदकाचो मारो सुरू करून उजो पालयलो.
मजगतीं, उजो लागले उपरांत आयनॉक्साच्या कर्मचाऱ्यांनी वाठारांत आशिल्ल्या फायर हायड्रंट यंत्रणांचो वापर करून उज्याचेर नियंत्रण मेळोवन हेर वाठारांनी पातळावपा पसून आडायलें. ताका लागून व्हड अनर्थ टळ्ळो. ह्या प्रकरणांत उजो पालोवपी दळान मुळावी चवकशी केली तेन्ना सेरेंडिपिटी आर्ट्स फेस्टिव्हल 2024 खातीर तात्पुरती लांकडी बांदकाम उबारपाचें काम सुरू आशिल्लें. थंय वेल्डींग करीत आसतना उजो लागिल्ल्याची म्हायती मुखार आयली. त्या वेळार थंय संबंदितांक कसलेच तरेचे प्रतिबंधक उपाय येवजण करूंक ना अशी म्हायती मुखार आयल्या. मजगतीं उज्याची घडणुकेची दखल घेवन उजो पालोवपी दळा कडल्यान आयोजकांक परतून प्रतिबंधक मार्गदर्शकत्वां जारी करतले. ह्या प्रकरणांत लुकसाणीचो आंकडो तशेंच उजो कित्याक लागून लागलो हाची चवकशी उजो पालोवपी दळ करतलें.
मजगतीं, ह्या प्रकरणाची पणजी पुलिसांनी उज्याची घडणूक म्हूण नोंद केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
