भांगरभूंय | प्रतिनिधी
पणजी: पणजे भाटल्यांत काल ९ डिसेंबराक रातच्या ८:४५ वरांचेर एक भिरांकूळ घडणूक घडली. भाटले, पणजेच्या राम मंदिरा लागसारचे बांदकाम चालू आशिल्ले इमारतींतल्या जॉन (४८) नांवाच्या कामगाराचो अरविंद तिवारी हाणें (३८, मूळ- लखनौ, उत्तर प्रदेश) खून केलो. उपरांत दुबावितान थंयच्यान पळ काडलो. मात दोन वरांनी ताका धरपाक पुलिसांक येस आयलें.
चड म्हायती प्रमाण, सोमारा रातीं अरविंद तिवारी आनी जॉन हांचे मदीं जेवणा वेल्यान झगडें पेटलें. हेच तिडकीन अरविंद हाणें जॉनाचो धार आशिल्ल्या शस्त्रान गळो कापून खून केलो. हे विशीं काॅण्ट्रेक्टर नजीर मुल्ला हांणी पुलिशेंत कागाळ केले उपरांत उत्तर गोंयचे पुलीस अधीक्षक अक्षत कौशल, उपअधीक्षक सुदेश नायक, निरीक्षक विजयकुमार चोडणकार, उपनिरीक्षक दीपेश शेटकार, हेड कॉन्स्टेबल नितीन गांवकार, कॉन्स्टेबल विकास नायक घडणुके सुवातेर पावले. पुरावे एकठांय करून फॉरेन्सेक टिमीचे मजतीन पुलिसांनी तिवारी हाका अटक केली.
अरविंदाचेर भारतीय न्याय संहिता २०२३ च्या कलम १०३ खाला गुन्यांव दाखल केला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
