भांगरभूंय | प्रतिनिधी
वास्को दोगां आड कागाळ; एकल्याक अटक
4 लाख 30 हजारांक फटयलें
वास्को: शिक्षण खात्यांत ‘मल्टी टास्क’ ची नोकरी दिवपाचें आस्वासन दिवन 4 लाख 30 हजार रुपया दोगां जाणांनी घेतले उपरांत, नोकरी दिलीच ना तशेंच पयशेय दिवपाचें नांव काडिनाशिल्ल्यान नवें वाडें हांगासरली साक्षी सुदर्शन केरकार हांणी वास्को पुलीस स्टेशनार कागाळ नोंद केल्या.
ह्या प्रकरणांत एक दुबावीत गोविंद मांजरेकार (42, बायणा) हाका वास्को पुलिसांनी आयतारा अटक केली. जाल्यार दुसरो दुबावीत आरोपी सुरज नायक हाचो सोद वास्को पुलीस घेतात. ह्या दोगांनी आनीक कितल्या जाणां कडल्यान नोकरे खातीर पयशे घेतल्यात हाचो तपास वास्को पुलीस करतात.
साक्षी केरकार हांचे कागाळीक लागून हेरूय लोक मुखार येवपाची शक्यताय आसा. हांगा कांय जाणांनी नोकरीचें हांयस दाखोवन कांय जाणां कडल्यान लाखांनी रुपया घेतिल्ले. तांचे मदीं आतां भिरांत पातळ्ळ्या.
गोविंद मांजरेकार आनी सुरज नायक हांणी साक्षी केरकार हांकां शिक्षण खात्यांत ‘मल्टी टास्क’ ची नोकरी दिवपाचें आस्वासन दिल्लें. ते खातीर तांणी 1 मार्च 2023 ते 31 मे 2023 ह्या तीन म्हयन्यां मजगतीं, साक्षी हांचे कडल्यान 4 लाख 30 हजार रुपया घेतिल्ले. उपरांत तांणी नोकरी दिवपा बदला टाळाटाळ सुरू केली. नोकरी दिना जाल्यार आपले घेतिल्ले पयशे तरी दियात अशी विनंती साक्षी हांणी केल्ली. पूण ते विनंती कडेन तांणी आडनदर केली.
आतां गोंयांत ‘जॉब स्कॅम’ गाजत आशिल्ल्यान धिटायेन साक्षी हांणी शेनवारा (9 वेर) सांजवेळा वास्को पुलीस स्टेशनार गोविंद मांजरेकार आनी सुरजन नायक हांचे आड कागाळ केली. वास्को पुलिसांनी हे कागाळीची दखल घेवन त्या दोगां आड भादंसं च्या 520 r/w 34 कलमा खाला गुन्यांव दाखल केला. उपरांत मांजरेकार हाका आयतारा अटक केली.
ह्या प्रकरणांत वास्कोचे उपअधिक्षक गुरूदास कदम आनी निरिक्षक कपील नायक हांच्या मार्गदर्शना खाला उपनिरिक्षक कॅरी फर्नांडीस फुडलो तापस करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
