भांगरभूंय | प्रतिनिधी
आयच्या धांवपळीच्या काळांत जायते दादले, बायलो सकाळीं योग्य प्रमाणांत नाश्तो करीनात. थोडे चायेच्या एका घोंटार बस चुकत म्हूण, नोकरेक उशीर जायत म्हूण भंयानूच अर्दपोटार घरा भायर सरतात. नोकरी करपी बायलो घरकाम, भुरग्यांची स्कुलाची तयारी हाका लागून चड नाश्तो करिनात. सकाळीं नाश्तो करप आमचे भलायकेक बरें. सकाळच्या नाश्त्यांत पुश्टीक घटक आसपाक जाय.
सकाळी एक रोटी, चपाती, गांवठी तूप, नाजाल्यार चिज बटर, कसलीय पातळ भाजी वा उसळी, रवो, उपीट खाल्ल्यार भरपूर नाश्तो जाता. दनपार मेरेन भूक सतयना. आमचे कुडीक उर्जा मेळटा. सपासप काम करपाची इत्साशक्त निर्माण जाता. जिवाक चिडचीड जायना. उमेदीन काम जावन पडटा. आमच्या सगल्या अवयवांक कॅलरिज, विटामिन्स मेळटात. नाश्त्याक खाल्लो प्रत्येक जिनस आमचे कुडीची झीज भरून काडटा.
सकाळीं कांयच खायनासतना उपाशी पोटार काम, धंदो, नोकरी करप भलायके खातीर सामकें मारक. खुबश्यो समस्या मागीर तकली वयर काडटात. सकाळचो नाश्तो करूंक ना जाल्यार युवा पिळगेक टायप टू डायबेटीस जावपाची शक्यता आसता. खेळ, शारिरीक उपक्रमांनी वांटो घेवपी तरणाट्यांनी सकाळचो नाश्तो घेवप ना, हें तर सामकें धोक्याचें. सकाळीं वेळार नाश्तो केल्यार आमचे कुडींत ग्लुकोज साठून उरता. जाका लागून आमची याद, मेंदू बरो उरता. सदांत नाश्तो करीनाशिल्ल्या युवा पिळगेचो ब्लड प्रेशर देंवता. ताका घुंवळ आयिल्ले वरीं दिसता. हड्ड्यांत धडधडपाक लागता. रोग प्रतिकार शक्त देवता. कसलेंय दुयेंस ल्हान पिरायेचेर लागपाक शकता. ताका लागून सदांच सकाळीं नाश्तो करचो.
सकाळीं इडली, फोव, मिस्तुराद केल्ल्या दोन- तीन पिठांची भाकरी, परोठा, चटणी, सुकी रोटी आसल्यार बरें. ह्या जिनसांनी फायबर, कार्बोहायड्रेड आसता. पुश्टीक जिनस खातकच मनीस दिसभर थकना. रातचे आमी न्हिदतात तेन्ना आमची कूड उपाशी उरता. ताका लागून सकाळीं उठले बरोबर नाश्तो करून हो उपास सोडप बरें.
– सिद्धी तिळवे
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
