भांगरभूंय | प्रतिनिधी
फोंडें : नाणूस- उसगांव वाठारांत रानवटी जनावरांचो उपद्रव बरोच वाडला. हांगा लागींच आशिल्ल्या रानांतल्यान जायतीं रानवटीं जनावरां जेवण, उदकाच्या सोदांत वायंगणांत येतात आनी पिकांची वाट लायतात. हाचो फटको वायंगण पद्धतीचें शेत करपी सामान्य शेतकारांक बसता. ह्या वाठारांत मेल्लो बिबटो मेळ्ळा. ह्या बिबट्याक कशें मरण आयलें हाची चवकशी रान खातें करता.
मजगतीं, कांय जाणांनी हे परिस्थितीचेर उपाय म्हणून गांवठी बॉम्ब आनी फांस वापरपाचो पर्याय आपणायला. थोडे मध्यानेर कासाक वतात. रानवटी जनावरां खातीर लायिल्ल्या फासांत आडकून ह्या बिबट्याक मरण आयिल्ल्याचो अदमास लोकांनी उक्तायला. जंय हो बिबटो सांपडला ती सुवात मुखेल राना पसून सुमार देड किमी पयस आसा. फाटल्या वर्साय उसगांवां रस्त्या कुशीक एक बिबटो मेल्ले अवस्थेंत सांपडिल्लो. ह्या बिबट्याचीं नाखटां कापिल्ली. सध्या रान खात्या वतीन नाणूस-उसगांव प्रकरणाची चवकशी सुरू केल्या.
मजगतीं, सत्तरी- फोंडेंच्या भितरल्या वाठारांत रानवटी जनावरांचो उपद्रव बरोच जाणवपाक लागिल्ल्यान शिकारे खातीर वचप्यांचीय व्हडा प्रमाणांत वाड जाल्या. फाटींच पाटवळ- वाळपय, सत्तरी एके घडणुकेंत शिकारे खातीर गेल्ल्या २२ वर्सां पिरायेच्या तरणाट्याक बंदुकेची गुळी लागून मरण आयिल्लें. हे विशींच्या तपासा मजगतीं पुलिसांनी दुबाविता कडल्यान आतां मेरेन मेळिल्ले म्हायती प्रमाण, चिंचमळ भागांत जायत जाण बेकायदेशीरपणान बंदुको वापरतात. हांगा गव्याचीय शिकार जाल्या. हें मांस जायत्या हॉटेल आनी आस्थापनांनी पावलां. ताची पुलीस चवकशी करतात.
ह्या वाठारांत आक्षेप घेवपा सारक्यो वस्तू आशिल्ल्याची पुलिसांक सुलूस लागल्या. हाका लागून सोद मोहीम सुरू केल्या. पुलिसांनी ह्या प्रकरणाच्या तपासा खातीर पांच पंगड तयार केल्यात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
