भांगरभूंय | प्रतिनिधी
पेडणें: रातच्या धा वरां उपरांत फोग मारपाक कायद्यान बंदी जरी आसली तरी ३१ डिसेंबराक रातचो मांद्रें मतदारसंघाच्या दर्यादेग वाठारांनी लाखांनी रुपया खर्च करून फोग मारलो. ताका लागून जूनस वाडो- मांद्रेंचो दोंगर पेटलो. हातूंत पर्यावरण मोगींनी ५००० परस चड झाडां मदलीं ३००० झाडां लासून गोबोर जाल्यांत, तशेंच काजू बागायतीचेंय लुकसाण जालां, अशें म्हणलां.
उजो पालोवपी जवान आनी बंब पावचे पयलीं थळाव्यांनी फुडाकार घेवन उजो पालयलो. जांणी फोग मारलो तांणी कसलेच तरेची जतनाय घेवंक ना. पर्यावरण मोगींनी फाटल्या धा वर्सां आदीं जीं झाडां लागिल्लीं त्या झाडां कापपाची घडणूक ३१ डिसेंबराचे राती कडेन घडली.
हो उजो पालोवपा खातीर थळावे तरणाटे हाताक मेळटा त्या आयदनांत उदक भरून तें दोंगरार व्हरून उजो पालयतना दिसताले. हातूंत रविराज पेडणेंकार, प्रवीण म्हामल, सुरेन म्हामल, देवता म्हामल, प्राची म्हामल, उद्देश पेडणेंकार, आकार दाभाळे आनी हेर जायत्या तरणाट्यांनी दोंगराचेर धांव घेतली. तांणी जीव धोक्यांत घालून हो उजो पालोवपाचो यत्न केलो. मात पर्यावरण प्रेमींनी लायिल्लीं झाडां कोणाकूच वाटावपाक मेळ्ळीं नात. ताका लागून पर्यावरण मोगींनी हे घडणुकेचो निशेध करून दुख्ख उक्तायलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
