भांगरभूंय | प्रतिनिधी
दिवचलः दिवचलेचे नगराध्यक्ष पुंडलीक उर्फ कुंदन फळारी हांचे आड पालिकेच्या 9 नगरसेवकांनी नगरपालिका संचालनालयांत अविस्वास थाराव दाखल केला. हाका लागून दिवचल पालिकेचें राजकारण अस्थीर जालां. हे पालिकेंत वट्ट 14 नगरसेवक आसात. हे पालिकेंत भाजपाची सत्ता आसा. अविस्वास थारावाचेर सय करपी चडशे नगरसेवकय भाजपाचे खर समर्थक आसात. ताका लागून दिवचले पालिकेंत आतां भाजपा आड भाजपा अशें चित्र तयार जालां.
अविस्वास थारावाचेर उपनगराध्यक्ष दीपा पळ, नगरसेवक अनिकेत चणेकार, अॅड. अपर्णा फोगेरी, राजाराम उर्फ सतीश गांवकार, तनुजा गांवकार, पांडुरंग उर्फ गुंजन कोरगांवकार, निलेश टोपले, अॅड. रंजना वायंगणकार, दीपा शिरगांवकार ह्या णव नगरसेवकांनी सय केल्या. नगराध्यक्ष फळारी बेकायदेशीर कामांक तेंको दिता, सत्तेचो गैरवापर करता, कसलेय निर्णय घेतना आपल्या वांगड्या नगरसेवकांक विस्वासांत घेना आनी कामां करपाक तांकां अपेस आयलां अशें अविस्वास थारावांत नमूद केलां.
2021 वर्सा नव्या मंडळाची थापणूक जाले उपरांत कुंदन फळारी हे नगराध्यक्ष आशिल्ले. पूण, आतां तांच्या गटाची उपनगराध्यक्ष दीपा पळ, नगरसेवक निलेश टोपले आनी अॅड. रंजना वायंगणकार विरोधी गटांत आयिल्ल्यान हो अविस्वास थाराव दाखल केला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
