दामोदर बांदेकार किर्लपाल- दाबाळचे तर प्रीती पोरस्कडेंची सरपंच म्हूण विरोधा विणें जैतिवंत
भांगरभूंय | प्रतिनिधी
पेडणें, फोंडें, प्रतिनिधी: किर्लपाल-दाबाळचे नवे सरपंच म्हणून दामोदर बांदेकार हांची जाल्यार पोरस्कडेंची सरपंच म्हूण प्रीती हळदणकार हांची मंगळारा जाल्ले वेंचणुकेंत विरोधाविणें निवड जाली.
किर्लपाल-दाबाळ पंचायतीच्या ९ मदल्या ५ पंच वांगड्यांनी सरपंच रुक्मिणी गांवकार हांचे आड अविश्वास थाराव संमत केल्लो. दामोदर बांदेकार हांची हाचे पयलीं दोन फावटी सरपंच म्हणून नेमणूक जाल्ली. सरपंच पदा खातीर दामोदर बांदेकार हांचो एकूच अर्ज दाखल जाल्लो. ह्या वेळार रुक्मिणी गांवकार, उपसरपंच कालिदास गांवकार, पंच रमाकांत गांवकार, भालचंद्र गांवकार, बारकेलो उर्फ भोला गांवकार, सपना गांवकार आनी राजेंद्र वेळीप हाजीर आशिल्ले. निरीक्षक म्हणून आयिल्ले गट विकास कार्यालयाचे अधिकारी देऊ माईणकार हांणी एकूच अर्ज दाखल जाल्ल्यान दामोदर बांदेकार हांची विरोधाविणें निवड जाल्ल्याची घोशणा केली.
दामोदर बांदेकार हांणी, सगळ्या पंचांच्या सहकार्यान आडकून उरिल्लें पंचायत इमारतीचें काम पुराय करपाचो यत्न करतलों, अशें सांगलें. आदल्या सरपंचाच्या चल्यान पंचायत कार्यालयांत हस्तक्षेप केल्ल्यान सरपंचा आड अविश्वास थाराव दाखल केल्लो. पंचायत वाठारांतली उदरगत करतना कसलेच तरेचे मतभेद करचो ना अशेंय तांणी सांगलें.
प्रीती हळदणकाराक आमदाराचीं परबीं
निशा हळदणकार हांणी सरपंच पदाचो राजिनामो दिले उपरांत पोरस्कडेंचें सरपंच पद रितें आशिल्लें. पंचायत मंडळाची विशेश बसका जावन सरपंच पदा खातीर निवडणूक घेतली. ह्या वेळार प्रीती हळदणकार हांचो एकूच अर्ज सरपंच पदा खातीर आयिल्ल्यान तांची विरोधा विणें निवड जाली.
ह्या वेळार उपसरपंच सिद्धी गडेकार, पंच रुपेश हळदणकार, पंच एकनाथ तेली, पंच मुकुंद खाजनेकार, आदले सरपंच तशेंच पंच निशा हळदणकार, दर्शन हळदणकार हाजीर आशिल्ले. पेडणेंचे आमदार जीत आरोलकार हांणी सरपंच हळदणकार हांकां फुलांचो तुरो भेटोवन परबीं भेटयलीं.
आर्लेकार हांणी नव्या सरपंच आनी पंचायत मंडळान गांवचे उदरगती खातीर वावुरचें. सरकारा वरवीं योग्य तें सहकार्य मेळटलें, अशें सांगलें.
प्रीती हळदणकार हांणी गांवची तशेंच दरेका प्रभागाची पंचायत मंडळांच्या तशेंच आमदार आनी सरकाराच्या सहकार्यान उदरगत करतलीं. हेर पंच वांगड्यांनी विस्वास दाखयला ताका पात्र थारतलीं, अशें सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
