भांगरभूंय | प्रतिनिधी
क्षमीकरणांतल्यान आई बदलल्या, फाटल्या साडेतीन दसकांत णववारी कापडांतल्यान साडी, चुडिदार, पँट- शर्टांतय ती पावल्या.
रांदचे कुडींतल्यान ती भायर सरली तरी रांदची कूड तिका सोडिना. चवथी वेळार घरा रांदप, वाडप करतना कुळाराच्या आंगणांत कितली ‘म्हारगाय गे सायबिणी’ म्हणत ती फुगडीय घालता. तेंपा प्रमाण तिचो भेस बदलता पूण कितलीय जाल्यार ती आई. ते मायेचें, हे भुंयेचें रीण आमी कशें विसरप? ती गौरी, रिद्धी, सिद्धी, गंगा जाता, देश विदेशांतय भोंवता आनी निमाणे आईक, कुलदेवतेक वंदन करूंक येता.
ती एक धूव, चली, भयण हें आमी, तुमी विसरचें न्हय. केन्ना आई तर केन्ना आते, मामी, मावशी, आजी, दादी, नानी, काकी, वयनी, ताई अशीं तिचीं रुपां. ती एक अस्तुरी, अस्तुरे बगर हो संवसार अर्दकुटो. तिका वीज, उदक, कोयर वेवस्थापन, रांदप वाडप शिक्षण आनी नोकरे बराबर आयजय लागता. एक अस्तुरी आयज व्हड देशाची राष्ट्रपती, अर्थमंत्री जाली तरी आपली लागणूक विसरना. तीच नारीशक्ती देश, विदेशाच्या, राज्याच्या कोनशा-कोनशांतली आमच्या- तुमच्या लिखाणांत दिसता. साडेतीन दसकांचे पत्रकारितेंत अखील भारतीय महिला परिशदेच्यो अध्यक्ष शोभना रानडे, ‘स्त्री’च्यो विद्या बाळ हांची वळख जाली. गोंयचे अस्तुरेन थारयल्यार, एकठांय येवन विरोध केल्यार रातीची नायटलायफ किद्याप बंद जावची ना? हे तिचेच मुलाखतींतल्यान आमी सांगलें, तुमीय सांगात.
अन्याय, अत्याचार पत्रकारितेक तिकाय सोंसचे पडटात, घरकाराक तेंको दितना तिचें राजकारण कुशीक उरता. समाजकारण, स्त्री आधार केंद्रां, महिला आयोगांतल्यान डॉ. नीलम गोऱ्हे आयज महाराष्ट्रांत एक वरिश्ठ राजकी फुडारी आसात. तांकां दिका दिवपी पत्रकार चंद्रकांत घोरपडे. गोंयचे अस्तुरी आयोगाची बुन्याद घालपा खातीर ते वावुरले, आमकांय तिचे खातीर वावुरपाक शिकयलें. राजकारणांत नाशिल्ल्यो डॉ. प्रमोद साळगांवकार आयोगाच्यो अध्यक्ष अजुनूय यशोदामिनी पुरस्कारा पासून पयस रावल्यो. तांच्या आदाराक बायलांचो सादाच्यो मुखेली सबिना मार्टिन्स. वांगडी आल्बर्टिना फर्नांडिस, बायलांचो एकवटाच्यो आवडा विएगश, तारा केरकारय. आपयल्यार आजूय त्यो महिला आयोगा खातीर धांवन येतल्यो.
डॉ. प्रमोद दोनदां गोंय महिला आयोगाच्यो अध्यक्ष जाल्यो. राजकारण कुशीक दवरून वावुरतना अखील भारतीय काँग्रेसच्यो वांगडी जावन पयलें महिला पुलीस ठाणे ताणींच सुरू करपाक लायलें. गोंयच्या कोनशा-कोनशांनी भोवन महिला आयोग, घरांत जावपी छळणूक, लैंगीक शोशणा विशीं कृतिसत्रां तांणी घेतलीं. गोंयचे अस्तुरेक आवाज दिवपांत तांचो व्हड वांटो. मंत्र्यां कडेन फायली धाडून ताका मान्यताय मेळोवन घेवपा खातीर फाटल्यान लागपी अध्यक्ष म्हणून त्यो यादींत उरतल्यो. बिगर सरकारी यंत्रणां वांगडा आंतरराष्ट्रीय महिला दीस मनोवपी, बायलांचेर जावपी अत्याचारा आड आंदोलनांत वांटो घेवपाची तांची देख फाटल्यान आयिल्ल्यांनी घेतली. अॅड. स्वाती कर्पे, वैदेही नायक, बिना नायक, अॅड. शुभलक्ष्मी नायक, अॅड. शुभलक्ष्मी रायकार हांचे वरी मुख्यमंत्र्यांच्यो घरमंत्री सुलक्षणा सावंत ह्योय सक्षम अस्तुरी. आदल्यो आमदार, मंत्री व्हिक्टोरिया फर्नाडिस हांचे वरी दुर्गा जावप आमदार देविया राणे हांकां शक्य आसा? घरकाराक वेंचून हाडपा खातीर वावुरतना तांचो विधानसभेंत जाल्लो प्रवेश गोंयचे अस्तुरेचो भोवमान. महिला आयोगाचो भार तांकांय घेवचो पडटलो.
गोंयच्या बालभवनाची जापसालदारकी विजयादेवी राणे हांचे उपरांत कुंदा चोडणकर, शीतल नायक हांणीय घेतली. महिला आयोगा कडेन सरकारान आडनदर केल्यार अस्तुरे विशींचे गुन्यांव वाडटलेच. अस्तुरी आयोग, बाल कल्याण खातें, बालक आयोग, बाल कायद्याची अस्तुरेच्या सक्षमीकरणांतल्यान गोंयांत बांदावळ जाली. रंजिता पै ह्यो सक्षम अस्तुरी, आशा दिगंबर कामत, सुलक्षणा सावंत, जेनिफर मोन्सेरात हांणी तांचे बराबर रावचें. गोंयांत दिसाळ्यांतलें पयलें अस्तुरी व्यासपीठ बांदपी उज्ज्वला तारकार, सोनाली अस्नोडकार, एलिना साल्ढाणा महिला आयोगार किद्याक नात? दिसाचो थोडो वेळ दियात, अस्तुरेक अस्तुरेचें म्हत्व सांगात. वीस वर्सां आदीं ‘चली जायच म्हणा’ ह्या लिखाणांतल्यान आमकां पुरस्कार हाडले, जागृताय जाली.
अस्तुरेक खासा बशी, बशींनी खासा सुवाती, कन्याधनांतल्यान लाडली लक्ष्मी, गृह आधार मेळ्ळो. म्हजी बस फकत अस्तुरे खातीर कित्याक जावची न्हय? चली भुरग्याक शाळेंत, म्हाविद्यालयांत आवय, बापायक आयज कित्याक पावोवचें पडटा? भिरांकूळ खबरींनी आवय बापूय भियेतात जाल्यार भिवपाची गरज ना अशें मुख्यमंत्र्यांनी सांगचें. केंद्रीय येरादारी खात्या कडल्यान खासा अस्तुरेचे भौशीक येरादारी पासत निधी मेळूंक शकता.
हे माये म्हादय, हे मांडवी, हे गौरी, रिद्धी, सिद्धी, गंगा तुमीच जायात, एकामेकांच्या आदारान माचयो उबारात.
तिची व्हडवीकाय परतून एकदां सांगतना तिचे खातीर वावुरपाचो, तिका लोकसभेर व्हरपाचो, थाकाय दिवपाचो सोपूत घेवया. म्हादय खातीर पयलींच्यो मंत्री निर्मला सावंत, बिना नायक, अनघा आर्लेकार, रंजिता पै, आल्बर्टिना आल्मेदा हांकां बिनविरोध लोकसभेर वचूंक मेळत? राष्ट्रपतींनी गोंयांतल्यान अस्तुरे विशींचे लागणुकेची, समानतायेची जाणविकाय करून दिल्या. सोदल्यार पंचायत ते जिल्ल्यांतली, नगरपालिका, म्हापालिकेंतली गोंयची स्त्रीशक्ती लोकसभे मेरेन पावतली.
कुडचडें, बाळ्ळी, पणजेचे दंगलीतय स्त्रीशक्ती आशिल्ली. कोणें उदक दिलें? कोणें मनीसपण दाखयलें? कोणें सत सोदपाचे येत्न केले? आयजय ती समानताय मागता. तिका बराबर घेतल्यार जिखतले, उजोय पालोवंक शकतले. तिका अर्थीक, भुजांबळ आयजय जाय, भलायकी आनी साधनसुविधा तिच्याच नांवार सुदारल्या. कायदेय जातात, दोश दाखोवपाक, पयसावपाक तिचे बगर पर्याय ना.
सुहासिनी प्रभुगांवकार
9881099260
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
