भांगरभूंय | प्रतिनिधी
पणजीः नाताळ आनी नव्या वर्साच्या निमतान केक आनी हेर बेकरी पदार्थ तयार करपा खातीर तांतयांची मागणी वाडल्या. हाका लागून पणजे आनी भोंवतणच्या वाठारांनी तांतयांचे दर वाडल्यात. सोमारा तांतयांचे दर 20 रुपयांनी वाडून 90 ते 95 रुपया डझन जाले. फुडल्या कांय दिसांनी तांतयांचे दर 100 रुपया डझन जावपाची शक्यताय वेपाऱ्यांनी उक्तायल्या. मजगतीं, पणजी बाजारांत भाजयेचे दर फाटल्या सप्तका इतलेच आसात.
आयज सोमारा पणजे बाजारांत कांदो 70 ते 80 रुपया किल दरान आशिल्लो. टमाटाचे दर 50 रुपया किल आनी बटाट 50 रुपया किल दरान विकतात. भेंडें, काराती, वांयगें आनी दोडगी दरेकी 80 रुपया किल दरान विकतात. चिटकी 60 रुपया किल जाल्यार वालपापडी 120 रुपया किल आसा. गाजराचे दर 20 रुपयांनी वाडून ते परतून100 रुपया किल जालें. जाल्यार तवश्यांचें दर 10 रुपयांनी वाडून 60 रुपया किल जालें. डब्बू मिरसांग 80 रुपया आनी मिरसांग 100 रुपया किल मेळटा.
ह्यो भाजयो सवाय…
बाजारांत गवारीचे दर 20 रुपयांनी देंवले आनी 60 रुपया किल जालें. फ्लॉवरचे दर 10 रुपयांनी देंवून आतां 50 रुपयाक एक नग मेळटा. कोबीचे दर 50 रुपया किल आसा. मटार 140 रुपया दर किल, दुदी भोपळो 50 ते 80 रुपया किल आशिल्लो. मेथी 25 रुपया, पालक १५ रुपया, तांबडी भाजी १५ रुपया. कांद्याची पात 15 रुपया आनी कोथबीर 20 रुपया जुडी आसा. जाल्यार आलें १६० रुपया, लसूण ५५० रुपया आसा.
मजगतीं, फलोत्पादन मंडळाच्या गाड्यांर भेंडे 43 रुपया, कोबी 32 रुपया, गाजर 65 रुपया, वालपापाडी 63 रुपया, मिरसांग 40 रुपया, कांदो 65 रुपया, बटाट 43 रुपया जाल्यार टमाट 35 रुपया किल आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
