भांगरभूंय | प्रतिनिधी
मुख्यमंत्रीः तपासा विशीं हरियाणा मुख्यमंत्र्यांची चर्चा
नुनीस, रामा, दत्तप्रसादाक 5 दिसांची पुलीस कोठी
नुनीसाचो जामीन अर्ज भायरायलो
पणजी : अभिनेत्री तशेंच भाजपाची फुडारी सोनाली फोगट खून प्रकरणाचो तपास सीबीआय कडेन दिवपाची सरकाराची तयारी आसा. मुख्यमंत्री डॉ. प्रमोद सावंत हांणी ही म्हायती दिल्या. हाका लागून आतां खंयच्याय खिणाक हो तपास गोंय पुलिसां कडल्यान सीबीआय कडेन वर्ग जावप शक्य आसा. सोपस्कार पुराय केले उपरांत हे विशींचो निर्णय जातलो, अशें मुख्यमंत्री डॉ. प्रमोद सावंत हांणी सांगलें.
हरियाणाचे मुख्यमंत्री मनोहरलाल खट्टर हांणी गोंयचे मुख्यमंत्री डॉ. प्रमोद सावंत हांचे कडेन चर्चा केली. ह्या वेळार तांणी तपास सीबीआय कडेन दिवपाची मागणी केली अशी म्हायती मुख्यमंत्री डॉ. प्रमोद सावंत हांणी दिली.
आदली टीक टॉक स्टार आनी रियलिटी शो मदली अभिनेत्री सोनाली फोगट हिका 23 ऑगस्टाक मरण आयले उपरांत हॉस्पिटलांत दाखल केल्ली. हरियाणा सावन गोंयांत आयले उपरांत तिका मरण आयिल्लें. गोंय पुलिसांनी पयली खुनाचो गुन्यांव नोंद करूंक नासलो. प्रथमदर्शनी पुरावे मेळ्ळे उपरांत खुनाचो गुन्यांव नोंद करून तपास सुरू केलो. आतां मेरेन पुलिसांनी 5 जाणांक अटक केल्या.
पुलीस योग्य दिशेन तपास करतात. सोनाली फोगट हिच्या कुटुंबियांनी चंदिगंडांत हरियाणाचे मुख्यमंत्री मनोहर लाल खट्टर हांची भेट घेतली. तपास सीबीआय कडेन दिवचो अशी मागणी कुटुबियांनी केल्ल्याचें खट्टर हांणी आपणाक सांगलें अशें मुख्यमंत्री डॉ. प्रमोद सावंत हांणी म्हणलें.
खून प्रकरणांतले मुखेल दुबावीत सुधीर सांगवान आनी सुखविंदर पाल सिंग हांकां पयलींच 10 दिसांचो रिमांड दिला. हाका लागून पांचूय दुबावीत पुलीस कोठयेंत आसात. सोनाली फोगट हिका घुंवळे वखदां पियेवपाक दिल्ल्यान तिका मरण आयलें असो पुलिसांचो निश्कर्श आसा. हणजूण हांगासरल्या रामा मांद्रेंकार हाणें घुंवळे वखदां दत्तप्रसाद गांवकार हाका दिली. दत्तप्रसाद गांवकार हाणें ती सुधीर सांगवान हाका विकली, अशी म्हायती उक्ती जाल्या. घुंवळे वखदां पियेवपाक दिवपाचो प्रकार कर्लीस बीच क्लब शॅकान जालो. कर्लीस बीच क्लब शॅकाचो धनी एडवीन नुनीस हो लेगीत पुलीस कोठयेंत आसा.
कर्लीस रॅस्टोरंण्टाच्या शौचालयांत 2.2 ग्रॅम मेटाफेटामायन घुंवळे वखद मेळ्ळें उपरांत एडवीन नुनीस हाका पुलिसांनी अटक केल्ली. पेंयांत घुंवळे वखद घालून दिल्ल्यान सोनालीक मरण आयलें. सुधीर सांगवान आनी सुखविंदरपाल सिंग हांणी हें पेय दिलां, असो निश्कर्श आसा. हे फाटभुंयेर तपास सुरू आसा. ह्या दोगांनी सोनाली फोगट हिचो खून कित्याक केलो? हे विशीं चवकशी सुरू आसा.
3 दुबावितांक 5 दिसांची पुलीस कोठी
म्हापशेंच्या न्यायालयान 3 दुबावितांक 5 दिसांची पुलीस कोठी दिल्या. कर्लीस बीच क्लब शॅकाचो धनी एडवीन नुनीसाचो जामीन अर्ज न्यायालयान न्हयकारला. एडवीन नुनीस हांचे सयत दत्तप्रसाद गांवकार आनी रामदास मांद्रेंकार हांकांय 5 दिसांचो रिमांड दिला.
नुनीस हो कर्लीसाचो धनी न्हय
घुंवळे वखदां कर्लीस रॅस्टोरंण्टाच्या शौचालयांत मेळिल्ल्यान नुनीस हाका अटक केल्या. अटक केल्लो नुनीस हो कर्लीस बीच क्लब शॅक रॅस्टोरंण्टाचो कायदेशीर धनी न्हय. कायदेशीर धनी दुसरो आसा. हाका लागून आपलो अशील एडवीन नुनीस हाका अटक करपाचे कसलेंच कारण ना. एनडीपीएस न्यायालयांत आमी आव्हान दितले अशेंय एडवीन नुनीसाच्या आदवोगादान सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
