भांगरभूंय | प्रतिनिधी
पणजी : ऑनलायन फटींगपणाच्यो घडणुको वाडपाक लागल्यात. अशीच एक घडणूक फोंडें पुलीस स्टेशनांत नोंद जाल्या. ट्रक चालक आशिल्ल्याचें सांगून अनवळखी मनशान युपीआय वरवीं पयशे धाडपाक लावन एकल्याक २.८० लाख रुपयांक तोपी घातली. ह्या प्रकरणांत फोंडें पुलिसांनी अनवळख्या आड गुन्यांव नोंद केला.
हे विशीं सविस्तर म्हायती प्रमाण, एकल्यान पयलीं मोबायलाचेर संपर्क करून मंगळुरूच्यान छत्तीसगडाक माल पावोवपा खातीर वाहन सेवा जाय आशिल्ल्याचें सांगलें. उपरांत अनवळखी मनशान संपर्क करून आपूण चालक आशिल्ल्याचें सांगलें आनी ट्रकाची पुरवण करता अशें सांगलें. विंगड विंगड फोन नंबरांवेल्यान संपर्क करून, बरें उलोवन ताचो विस्वास जिखलो आनी ट्रकाचें भाडें म्हणून २.८० लाख रुपया फोन पेचेर यूपीआयवेल्यान धाडपाक लायले. ताच्या फटींगपणाक बळी पडून पयशे धाडले उपरांत ट्रक सेवाय दिवंक ना आनी पयशेय परत दिवंक ना.
उपरांत फटींगपणां जाल्ल्याचें समजतांच हे विशीं फोंडें पुलीस स्टेशनांत कागाळ केली. फोंडें पुलिसांनी अनवळख्यां आड गुन्यांव नोंद केला, फुडलो तपास उपनिरीक्षक बन्सल नायक करतात.
मजगतीं, फोनावेल्यान संपर्क करून वेगवेगळ्या कारणां खातीर पयशे मागून फटींगपणां करप्यां पसून सांबाळून रावपाचो उलो पुलिसांनी मारलो. ऑनलायन फटींगपणांत आडकून कितें आसा तें वगडावचें न्हय, असो उलो मारलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
