भांगरभूंय | प्रतिनिधी
ट्युशन ही आयजकाल फॅशन जाल्या आनी तीच फॅशन पालकांचो गैरसमज. भुरगो खंय ट्युशनांक वचुनूच पास जाता, घरा तो कांयच शिकना अशें आतांचे पालक कागाळ करतात. खरेच पालक सांगता तशे भुरगे घरां कांयच शिकनात आनी ट्युशनाक वचुनूच पास जातात? पूण म्हजो प्रस्न ट्युशनाक अशें कितें वेगळे शिकयतात जे शिक्षक विद्यालयांत शिकयनात? एक शिक्षक जेन्ना वर्गांत शिकयता आनी भुरग्यांक समजले काय प्रस्न करता तेन्ना सगळ्यांच्यो मानो नंदी बैला भशेन हालतात आनी शिक्षक मात चण्याच्या झाडार चडटा पूण परिक्षेक पेपर तपासतकच ढो!!!! करून सकयल पडटा, कारण तेन्ना कळटा भुरग्यांक एक तर कळूंक ना आनी जर कळूंक ना जाल्यार तें विचारपाचो प्रयत्न करूंक ना. कारण तो आनी ताण कोण घेतलो? अशें जेन्ना घडटा तेन्ना मात प्रत्येक शिक्षकाची तकली सुन्न जाता. दुसरे वटेन अशेंय आसपाक शकता की वर्गांत शिक्षक 30- 40 वा मायज भुरग्यांक एकदम शिकयता म्हूण तांकां कठीण जाता आसत आनी ट्युशनाक प्रत्येक भुरग्याचेर लक्ष दिवप जाता आसत. पूण जितलें हांवें पळयलां वा म्हजे नदरेक आयलां तातूंतल्यान चडशां कडेन तरी विद्यालयांत जें कितें शिकयतात तेंच पोपटा सारके तोंड पाठ करून घेतात आनी नवीन कांयच करिना. वयल्यान कमीत-कमी रू. 500 ते रू. 2500 मेरेन फी घेतात.
प्रत्येक शिक्षक आपल्या परीन सगळो प्रयत्न करता आनी भुरग्यांक जितले सोंपे नाविन्यपूर्ण शिकोवपाचो यत्न करता. जर तर हे भुरगे शाळेंत लक्ष लावन शिकनात जाल्यार ट्युशनाक असलो कसलो तरी चमत्कार जाता जाचो तांचेर असर जाता. भुरग्यांक ट्युशनाक धाडपाचो खरो हेतू कितें? भुरगो घरा शिकना म्हूण काय आपल्याक आनी ताच्या फाटल्यान नाच्चे पडचें न्हय म्हूण? पळोवंक गेल्यार 24 वरांच्यान सकाळचीं 6 वरां शाळेंत आनी सांजेचीं 4 वरां ट्युशनाक जाल्यार किमान 10 वरां जर एक भुरगो पुस्तकांनीच आसत जाल्यार ताणें दोळे धांपून 90% वयर तरी परिक्षेक घेवपाकूच जाय न्हय? इतलीं वरां अभ्यास करुनूय आतांच्या शिक्षण पद्धती प्रमाण भुरगो नापास कसो जावपाक शकता? हाचोय विचार आमकां करचो पडटलो.
कावळ्याचे नदरेंतल्यान पळोवंक गेल्यार प्रत्येक भुरगो हो हुशार आसता, फक्त तांची आवड वेग-वेगळ्या क्षेत्रांत आसता. कांय भुरग्यांक खेळ आवडटा तर थोड्यांक चित्रां काडपाक तर थोड्यांचें लक्ष अभ्यासांत आसता. तर हें आसप गरजेचें कारण सगळेच जर दोतोर, शिक्षक आनी इंजिनियर जालें जाल्यार बाकीचीं कामां कोण करतलो. हांव अशेंय म्हणिना की भुरग्यांनी शिक्षणाचेर लक्ष दिवप ना. दर एका शिक्षकाक आपलो प्रत्येक भुरगो हो शिक्षणाच्या मळार उंच भरारी घेतना दोळ्यांत तेल घालून आतूरतायेन वाट पळयता कारण भुरग्यांची उदरगत हीच शिक्षकांची जैत.
पुरातन काळांत पालक चड शिकूंक नासताले. कारण तांची अर्थीक स्थिती अस्थीर आसताली. कारण एका कुटुंबांत धा ते बारा भुरगीं पदराक आसतालीं आनी सगळ्यांक शिक्षण दिवप शक्य जायनाशिल्लें. जितलें शिक्षण दिवपाक जातालें तितलें दिवपाचो यत्न पालक करताले आनी जरी भुरग्यां कडेन शिकपाक जमनासले तरी तांकां मात ट्युशनाक घातिल्ले केन्ना कानार पडूंक ना. पूण आतांचे परिस्थितीन वेगळेच वळण घेतला. आधुनीक काळांत पालकांक ट्युशनाचें भूत चडलां. चडशे पालक शिकल्यात धावी. तरी सुद्धा कामांक वचपाच्या नादांत घरा भुरग्यांचेर कोण लक्ष दितलो म्हूण भुरग्यांक ट्युशनांक धाडटात पूण खरोच ट्युशनाक वचून आपलो बाबू आनी बाय शिकता काय हाची वासपूस पालक करतात? जितलो वेळ ट्युशनाक येवपाक वचपाक लागता तितलोच वेळ जर भुरगीं आपल्याक आवडटा तातूंत सारलो जाल्यार तांकांय नित्यक्रमाची उमेद येतली. तांकां वीट येवची ना. कारण जिवितांत दर दिसा कितें तरी वेगळे करपाक जाय.
ह्या स्पर्धात्मक जगांत पालकांनी भुरग्यांक ज्या क्षेत्रांत आवड आसा त्या क्षेत्राचें प्रशिक्षण तांकां दिवपाक जाय, ना की आपलो भुरग्यान 99% वा 100% गूण घेवपाक जाय वा पयलो वा दुसरो येवपाक तांचेर चेपण हाडप. ह्या कलयुगांत पालक-भुरग्यांचें नातें पारदर्शक आसप गरजेचें.
इत्सा आसल्यार कितेंय करूं येता. ह्यो लेख पालकांक दोश दिवंक वा ट्युशन दिवप्यांच्या पोटारूय खोंट मारपाचो यत्न करिना, फक्त पालक आपलो भुरगो घरा आयकना म्हूण कागाळ करतात आनी सोंपो उपाय म्हूण तांकां ट्युशनाक घालपाच्यो गजाली आमच्या कानार घालतात. पूण जर भुरगो शिकपाक हुशार आसा पूण मस्ती करता जाल्यार ताका ट्युशन हो चुकीचो उपाय. होच गैरसमज पयस जावपाची गरज आसा.
प्रणिता शिरगांवकार
7507915039
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
