भांगरभूंय | प्रतिनिधी
घर खात्रेन आलाशिरो दिता आनी आमकां वेगवेगळीं ध्येयां पुराय करपाक आदार करता. घरांतल्या वेगवेगळ्या कुडींनी ताच्या वापरा प्रमाण वेगवेगळे वातावरण आसता. कुडींतली वस्तू कशी दवरतात ताचेर कुडीची प्रशस्तताय आदारून आसता.
आमच्या नांवाचें घर, जंय आमी आमच्या कुटुंबा वांगडा रावतात, सुशेग दिवपी, खोशेचे खीण दिवपी, संघर्शाक नवें बळ आनी उर्बा दिवपी घर. आमी आमच्या प्रिय व्यक्तीं वांगडा खोशयेन रावतात तें घर. वचपी रस्तो घराक, ताची वाट.. वाटे वयल्यो सुवाती हें सगळें पळय आसताना आमकां तांचे कडेनय आपलेंपणाची भावना आसा. आमच्यो समाजीक आनी भावनीक गरजो आमच्या कुटुंबांतले वांगडी पुराय करतात. घर म्हळ्यार आलाशिरो दिवपी, जाय तेन्ना हक्कान विसव घेवपाची सुवात. सुखी घराची शक्त अफाट आसता.
घर ही सगळ्यांत म्हत्वाची सुवात, जंय आमी फकत वेळ घालयनात, तर जंय आमचीं व्यक्तिमत्वां आनी आमचीं जिवीत आनी पिळग्यो तयार जातात. अशे तरेन घरांत सकारात्मक वातावरण आसप फकत सुखा खातीरच न्हय तर भुरग्यांच्या सैमीक विकासांतय आदार करता. जंय उर्जा मुक्तपणान व्हांवता आनी विसव घेता. सुखी घर स्वताक आनी कुटुंबाक पोसपाची सुवात म्हूण काम करता. एका वेळार धा सोयरे घरांत आयले तरी घरकान्नीक त्या सगळ्या सोयऱ्यांची जतनाय घेवपाची कुशळटाय आसता. घरांतले वांगडी आनी तो घराची भावनीक बुन्याद तयार करता. घर म्हणल्यार शारिरीक आनी मानसीक संरक्षण.
आमी खंय गेले तरी दरेका मनशाच्या मनांत ताच्या जिवितांत आयिल्ल्या घरांच्यो यादी भरतात. दारां, जनेलां, पाखें, सालां, बल्कांव, आंगण, आंगणांत वाडपी झाडां, घरांतलें तणावमुक्त वातावरण… यादींनी भरिल्लें घर म्हणल्यार आशीर्वाद, भावार्थ आनी प्रार्थनेची एक परिपूर्ण सुवात…. पूण आमी कशे वागतात ताचेर तें आदारून आसता. नितळसाण सांबाळटात त्या घरांनी सकारात्मक उर्जा व्हड आसता. आनी घरांतले सगळे भलायकेन बरे आसतात. दरेकल्याक आपले रावपाचे सुवातेचें सपन आसता. घरांतली गरज फकत घरांत रावून पुराय जाता म्हणून सगळ्यो सुविधा मेळोवपाचो दरेकलो यत्न करतात. घर ही वैयक्तीक उदरगत आनी जिणेक उपेगी शिक्षणाची सुवात. भुरग्यांची सगळ्या वटांनी उदरगत घरांतल्यान जाता. तीच तांच्या जिविताची बुन्याद.
घर म्हणल्यार आरामाची तशेंच मनरिजवणेची सुवात. ते खातीर योग्य फर्निचर आनी हेर सुविधा आसपाक जाय. घर पावस, वारो, रानवटी जनावर, उश्ण सुर्या, वादळ अशे तरेच्या आमच्या जिवितांतल्या वेगवेगळ्या घडणुकां पासून राखण दिता. ह्या वेळार कांय बंधनां तयार जातात. घर खात्रेन आलाशिरो दिता आनी आमकां वेगवेगळीं ध्येयां पुराय करपाक आदार करता. घरांतल्या वेगवेगळ्या कुडींनी ताच्या वापरा प्रमाण वेगवेगळे वातावरण आसता. कुडींतली वस्तू कशी दवरतात ताचेर कुडीची प्रशस्तताय आदारून आसता.
गौरी भालचंद्र
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
