भांगरभूंय | प्रतिनिधी
पणजी : गोंय हें उत्सवांचें राज्य. अंदूं वर्सा जानेवारी आनी फेब्रुवारींत जायत्यो जात्रा गोंयकारांक मनोवपाक मेळटल्यो. जात्रांक समाजाच्या एकवटाचें प्रतीक मानतात. येवपी दोन म्हयन्यांत गोंयांत जावपी जात्रा खंयच्यो आनी खंयच्या दिसा मनयतले हें पळोवया.
श्रीशांतादुर्गा कुंकळ्ळेकान्न जात्रा, फातर्पें
फातर्पेंचे श्रीशांतादुर्गा फातर्पेकान्न संस्थानाची जात्रा ३१ डिसेंबराक सुरू जाल्या. ती ३ जानेवारी मेरेन विवीध धर्मीक आनी सांस्कृतीक कार्यावळींनी मनयतले. उपरांत फातर्पेंचे श्रीशांतादुर्गा कुंकळ्ळीकान्नीची जात्रा शेनवारा, ४ ते ९ जानेवारी ह्या काळांत मनयतले. ४ जानेवारीकूच नेत्रावळीचे महामायेची तशेंच चोपडेंच्या क्षेत्रपाल देवस्थानाची जात्रा जातली. ५ तारखेक कोलवाळेंच्या जरीमरी देवस्थानाची जात्रा जातली. ७ जानेवारीक उसकय- पालयेंचे श्रीसातेरी महामाया पालयेकान्न देवळाची जात्रा जातली. ८ जानेवारीक मधलोमाज, मांद्रेंचे श्री महाकाल देवस्थानाची जात्रा जातली. ९ जानेवारीक नावेलेचे श्री महालक्ष्मी देवळाचो कालो, साळगांवच्या वेताळ देवस्थानाची जात्रा आनी मधलोमाज, मांद्रेंच्या श्री महाकाल देवस्थानाचो वर्धापन दीस मनयतले.
बोडगेश्वराची जात्रा
११ जानेवारीक म्हापशेंच्या बोडगेश्वराचो जात्रा मनयतले. १४ तारखेक पाज- शिरोडेंच्या ब्रह्मदुर्गा देवस्थानाची जात्रा , १५ तारखेर वरगांवच्या श्री चामुंडेश्वरी देवस्थान, पर्येंचें श्रीभुमीका देवस्थान आनी गावडेवाडो मांद्रेंच्या श्री सांतेरी गिरोबा देवस्थानाची जात्रा मनयतले. १६ जानेवारीक कार्लेच्या श्रीकलनाथ देवस्थान आनी नादोडच्या श्री माऊली भूतनाथ देवस्थानाची जात्रा मनयतले. २० तारखेक म्हापशेंच्या घाटेश्वर देवस्थानाची जात्रा, काणकाबांध- म्हापशेंच्या राष्ट्रोळी देवस्थानाची जात्रा आनी शिगांवच्या श्री महादेव देवस्थानाचो कालो मनयतले.
२३ जानेवारीक साळगांवच्या श्री शर्वाणीदेवी देवस्थानाचो वर्धापन दीस आनी घोटेली सांतेरी देवस्थानाचो कालो मनयतले. २४ जानेवारीक सोनावळी कुळेंच्या श्री कलनाथ सांतेरी दूधसागर देवस्थानाचो कालो. २६ जानेवारीक उगें-सांगेंच्या हेमांडदेव देवस्थानाचो कालो. ३० जानेवारीक वेर्लेच्या श्री राष्ट्रोळी नारायण देवस्थानाची जात्रा मनयतले. ३१ जानेवारीक सुकुर पर्वरेच्या श्री सिद्धिविनायक राष्ट्रोळी ब्राह्मण देवस्थानाची जात्रा. तशेंच धावेंच्या श्री हनुमान देवस्थानांत मूर्तीप्रतिश्ठापना दीस मनयतले.
फेब्रुवारींतल्यो जात्रा आनी हेर उत्सव
१ फेब्रुवारीक शिरसयच्या श्री महालक्ष्मी देवस्थानाचो तशेंच आल्तिन- पणजीच्या श्री सिद्धिविनायक देवळाचो वर्धापन दीस मनयतले. २ जानेवारीक कवळेंच्या श्री शांतादुर्गा देवस्थानाची आनी म्हारिंगण सांगेंच्या श्री कलनाथ देवस्थानाची जात्रा आनी असोळणेच्या श्री मारुती मंदिर आनी धाकटें भाट डोंगरीच्या श्रीजगदंबा षष्टी शांतादुर्गा देवस्थानाचो वर्धापन दीस मनयतले. ४ फेब्रुवारीक मंगेशीच्या श्री मंगेश देवस्थानाचो रथोत्सव जातलो. ६ फेब्रुवारीक ताकवाडो कुंभारजुवेंच्या श्रीमान गुरू वडेश्वर ब्राह्मण देवस्थान मंदिराचो वर्धापन दीस, जाल्यार मळा मारुतीगड पणजेच्या श्री मारूतीराय संस्थानाची जात्रा मनयतले.
११ फेब्रुवारीक श्री मंगेशी देवस्थानाचे जात्रेक सुरवात जाता. तोर्से- पेडणेंच्या श्रीदत्तगुरु देवळाचो वर्धापन दीस मनयतले. १४ फेब्रुवारीक डोंगरेचो इंत्रुज शिगमो तशेंच शेल्डें केपेंच्या श्रीसांतेरी शांतादुर्गा देवस्थानाचो वर्धापन दीस मनयतले. १५ फेब्रुवारीक सांगेंच्या पाईकदेव देवस्थानाची जात्रा मनयतले. २६ फेब्रुवारीक महाशिवरात्री तशेंच बायणा सासनोळेच्या श्रीगोमटेश्वर देवस्थान वर्धापनदीस आनी माडेल थिवेच्या श्री महागणपती देवस्थानाची जात्रा मनयतले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
