भांगरभूंय | प्रतिनिधी
पणजी ः राज्यांतले तरणाटे नुस्तेमारी क्षेत्रांत प्रवेश करपाक लागल्यात. दर्यादेगेवेलें राज्य आशिल्ल्यान गोंयाक ब्ल्यू इकॉनॉमी वरवीं उदरगत करपाची संद आसा. राज्यांतल्या तरणाट्यांनी ह्या क्षेत्रांत येवपाचो विचार करचो असो उलो मुख्यमंत्री डॉ. प्रमोद सावंत हांणी केलां. बिरेस्तारा पर्वरी अॅक्वा गोंय फिश फेस्टिवला खातीर जागृताय करपी गाडयेक पांचवो झेंडो दाखयलो. ह्या वेळार नुस्तेमारी मंत्री नीककंठ हळर्णकार आनी हेर अधिकारी हाजीर आशिल्ले.
प्रधानमंत्री नरेंद्र मोदी हांणी ब्ल्यू इकॉनॉमीक चालना दिवपा खातीर पीएम मत्स्यसंपदा सारकिल्ल्यो वेगवेगळ्यो येवजण्यो सुरू केल्यात अशें मुख्यमंत्र्यांन सांगलें. गोंयांत केंद्र सरकाराची राष्ट्रीय समुद्र विज्ञान आनी ध्रुवीय संशोधन संस्था आसा. ह्या संस्थांनी केल्लें संशोधन ब्ल्यू इकॉनॉमीचें ध्येय साध्य करपाक उपेगी थारूंक शकता. हाकाच लागून ह्या दोनूय संस्थांचो अंदूंच्या फिश फेस्टिवलांत आस्पाव करपाचे आसात.
तांणी सांगलें, 10 ते 12 जानेवारी मेरेन कांपाल हांगा जावपी ह्या महोत्सवांत तरणाट्यांक ब्लू इकोनॉमी विशीं चड म्हायती दितले. हातूंत वेगवेगळे प्रकारचे नुस्तें पळोवपाक मेळटलें. तशेंच खाणांचें स्टॉल, सांस्कृतीक कार्यावळी, चर्चा सत्रां घडोवन हाडटले. विकसीत गोंय 2047 चें ध्येय साध्य करपा खातीर सरकार नुस्तेमारी क्षेत्राक स्वयंपूर्ण करपाचो यत्न करता. हे खातीर नुस्तेमारी मळार परंपरे वांगडाच आधुनीक तंत्रगिन्यानाचो वापर करप गरजेचें आसा.
दर वर्सा फेब्रुवारींत फिश फेस्टिवल जाता. पूण अंदूं धावी आनी बारावेचे परिक्षेक लागून तो एक म्हयनो आदीं करतले. ह्या क्षेत्रांतल्या वेपाऱ्यांक फायदो जावपा खातीर ह्या महोत्सवांत बिझनेस टू बिझनेस सत्र आयोजीत केलां. तशेंच केंद्र आनी राज्य सरकाराच्या वेगवेगळ्या येवजण्यां विशीं म्हायती हांगा दितले. तरणाट्यांक ह्या मळार मेळपी संद विशीं मार्गदर्शन करतले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
