गोंयांत दोन धरणांत उदक तळाक

भांगरभूंय | प्रतिनिधी

हेर धरणांनी 25 टक्केच उदकाचो सांठो

पणजीः मे म्हयन्याचे पंदरशी आदींच राज्यांतली 4 धरणांतलें उदक तळाक वचपाक लागल्या. अंजुणें धरणांत सगल्यांत उणो म्हणल्यार फकत 22 टक्के उदकाचो साठो आसा. पंचवाडी धरणांतलें उदकूय देंवता. 24.6 टक्के उदक उरलां, आमठाणें 32.8, साळावली 33.5 टक्क्यार पावला. अशें आसले तरी फुडले 90 दीस पावतलें इतलो उदकाचो सांठो आसा. ताका लागून मॉन्सून उसरां पावलो तरी उदकाचो उणाव जाणवचो ना, अशी म्हायती उदकास्रोत खात्याचे मुख्य अभियंता प्रमोद बदामी हांणी दिली.

मेळिल्ले म्हायती प्रमाण, 8 मे अखेरेक अंजुणें धरणांत सगल्यांत उणें 22 टक्के उदक उरलां. जाल्यार शापोरा धरणांत 49.1 टक्के उदकाचो सांठो आसा. पंचवाडी धरणांत 24.6 टक्के, आमठाणें धरणांत 32.8 टक्के तशेंच दक्षीण गोंयची तान भागोवपी साळावली धरणांत 33.5 टक्के उदकाचो सांठो उरला. गावणें धरणांत 49 टक्के आनी तिळारी धरणांत 36.2 टक्के उदकाचो सांठो आसा.

फाटल्या दोन म्हयन्यांत वाडिल्ल्या तापमानाक लागून उदकाची मागणी वाडिल्ली. मे म्हयन्यांत ती आनीक वाडपाची शक्यताय आसा. ते खातीर धरणांतल्या उदकाच्या सांठाे उणो जातलो. मेळिल्लें म्हायती प्रमाण 8 मे अखेरेक साळावली धरणांतल्यान 8.50 घन मिटर प्रतिसेकंद (क्यूसेक्स) उदकाचो विसर्ग सुरू आसा. अंजुणें धरणांतल्यान 2.40 जाल्यार तिळारी धरणांतल्यान 20 क्यूसेक्स विसर्ग सुरू आसा.

पोरूं राज्यांत मान्सून उसरा म्हणल्यार 11 जून दिसा दाखल जाल्लो. सुरवातीक दोन दीस बरो पावस पडिल्लो. मात उपरांत कांय दीस पावसूच पडूंक ना. 20 जून मेरेन पावसाचें प्रमाण उणें आशिल्ल्यान राज्यांतल्या धरणांतले उदक सामकें उणें जाल्लें. ताका लागून उदकास्रोत खात्या वतीन उदक पुरवण करपा खातीर हेर पर्यायांचो विचार सुरू केल्लो. पूण जूनाचे निमाणे तशेंच जुलयाच्या पयल्या सप्तकांत पावसान नेटान हजेरी लायिल्ली. ते खातीर राज्यांतल्या धरणांतल्या उदकांत वाड जाली.

————

धरण/ उदकाची तांक /सध्या आशिल्लें उदक (हेक्टर मिटरांत)

साळावली/ 23,436/ 7,855.20

अंजुणें/ 4,483/ 987.50

आमठाणें / 585/ 192

पंचवाडी/ 436.8/107.62

चापोली/1,122/551.25

गावणें /177/ 86.80

तिळारी/ 46,217/ 16728.7