गुरुर्ब्रह्मा गुरुर्विष्णुः गुरुर्देवो महेश्वरः

भांगरभूंय | प्रतिनिधी

फाटल्या साडेतीन दसकांतल्या मुखेल करून पत्रकारितेंतल्या तुमच्या आमच्या गुरूंक फाल्यां सोमारा 3 जुलयाक वंदन करुया. तुमकां आमकां जल्म दिवपी आवय तुमचो आमचो पयलो गुरू. जे धर्तरेर (पृथ्वी) तुमी आमी जल्म घेतात ती धर्तरीय आमची गुरू. शाळा, म्हाविद्यालयांत विद्या दिवपी गुरूंची व्हडविकाय एकलव्यानच सांगची. विद्या मेळयली म्हणून जायना जिणेंत फुडें वचपाक, संकश्टां, आडमेळ्यां कडेन झगडत ह्या संवसारांत रावपाक घटाय दिवपी तुमचे आमचे वेवसायांतले, अध्यात्मीक गुरू आसतलेच तांची याद गुरुपुनवेक (गुरुपौर्णिमा) करुया. विखुरिल्ल्या पानांनी, पत्रपानांनी आमकां गुरूं कडल्यान पत्रकारितेच्या वेवसायांत पस्तीस वर्सां वयर तिगपा खातीर केल्ल्या मार्गदर्शनांतले कण वांटपाचो यत्न तुमी आमी करुया. वरिश्ठ पत्रकार प्रमोद खांडेपारकार हांचे कडल्यान अध्यात्मीक गुरू म्हणून मोलाचो वावर घडला. श्री साई अध्यात्मीक समिती, पुणेचें शक्तीपीठ पर्वरे आसा. ह्या शक्तीपिठाची स्थापना करपी सद्गुरूनाथ दादा भागवत हांच्या मार्गदर्शनांतल्यान प्रमोदबाब हांचे वरी गुरू घडले आनी हेरांक तांणी वास्तवांतल्यान फुडें वचपाचो मार्ग दाखयलो. प्रमोदबाब आमचे पिळगेंतल्या पत्रकारांचे गुरू, वायट बरें सांगपी. सद्गुरुनाथ दादांक आनी प्रमोदबाबांक गुरुपौर्णिमेक वंदन करतना गोंयां खातीर शांतीकाय, सदभाव मागुया.
प्रमोदबाब हांची पत्रकारिता इंग्लीश दिसाळ्यांतल्यान गोंयकारांक कळ्ळी, पत्रकार, ज्येश्ठ राजकारणी तांकां विसरचे नात. प्रमोदबाब बरे कोंकणी, मराठी उलोवपी, बरोवपी, गोंय सरकाराचे पयलींचे माध्यम सल्लागारय. पुरस्काराची आस्त बाळगिनास्तना तांणी केल्ली बातमीदारी, मुलाखती, स्तंभलेखन, बरयल्ले संपादकीय लक्षांत उरपा सारकें. साई अध्यात्मीक सेवा समितींतल्यान ते हजारांनी भक्तांचे गुरू जाले.
पत्रकार चंद्रकांतबाब केणी हांचे वरी ज्येश्ठ पत्रकार, पयलींचे आमदार, साहित्यीक उदयबाब भेंब्रे हांणीय मडगांवच्यान पणजे पत्रकारितेंत वचपाची वाट दाखयली. उदयबाब आमचेच न्हय हजारांनी तरनाट्यांचे पत्रकारितेंतलेच न्हय जाल्यार साहित्यांतलेय गुरू. तांकां आनी तांच्या ‘ब्रह्मास्त्र’ पुस्तकांतल्या परशुरामाक सलाम.
पुराणांतल्या परशुरामांक पळय नासतना मांडवीचेर परशुराम पुतळो उबो करतल्यांक नमस्कार. नकळटा ‘भांगरभूंय’ दिसाळ्याचे दिवाळी अंक 2022 तले म्हजे कथेक, म्हादय प्रवाहाक मांडवी न्हंये वयलो परशुराम बळगें दिता. गोंय दृश्टीक्षेप 2035 अहवालाचेरय परशुराम आसा, सरकाराक वेगळे वाटेन चलपा खातीर घटाय दिवपाक तोच उपेगी. समेस्तांक सरकारान जें कितें केलां तें भावतलेंच, अशें न्हय पूण हे आदीं स्थीर सरकार दिवपी प्रतापसिंह राणे आनी मनोहर पर्रीकार हांच्या मार्गान मुखेलमंत्री डॉ. प्रमोद सावंत हांचें सरकार वता, वेगळे प्रयोग करता हें सत.
शिक्षण आनी गुरूंचें व्हड, लागशिल्लें नातें. विद्यार्थ्यांक फुडारांत व्हरपी, मळब पळय, झाडां, फुलां, फळांची वळखुपाक शिकोवपी गुरू घडोवपाचें आव्हान सरकारा मुखार आसा. संघ परिवार, शिक्षणीक संस्थां वांगडाच गोवा कोंकणी अकादेमी, गोवा मराठी अकादमी ते खातीर सरकाराक मजत करतल्यो?
शिक्षण हक्क कायद्याचो आदार घेवन नवी शिक्षण निती, धोरण करपी शिक्षकां मुखार तांच्या गुरूंचो आदर्श आसतलोच. नवें शिक्षण धोरण चालीक लायतना राणे, पर्रीकार हांची नितीच कांय वर्सां उरतली हें बालनिती घडोवप्यांक खबर ना? बालनितींतल्या चित्रबोधाचें पुजन गुरुपौर्णिमे दिसा दर वर्सा जावचें, चित्रबोधांतल्यान अपरी, खापरी ते दुसरी मेरेन भुरग्यांचें शिक्षण जाल्यार लुकसाण ना. राणे, पर्रीकार, डॉ. सावंत हेच न्हय जाल्यार मराठी, कोंकणी अकादेमीचे अध्यक्ष अनिल सामंत, अरुण साखरदांडे, ज्येश्ठ साहित्यीक उदयबाब भेंब्रे हांचे बराबरीन युवा साहित्यीक तन्वी कामत बांबोळकार हांचें मुळावें शिक्षण मायभाशेंतल्यान जालां. पद्मभूषण डॉ. अनिल काकोडकार, डॉ. रघुनाथ माशेलकार आनी शेंकड्यांनी दोतोर, इंजिनियर घडोवपी मुष्टीफंड आर्यनाचे संस्थापक व्यंकटेश प्रभुदेसाय मराठी भाशेंतल्यान प्राथमीक शिक्षण घेवपी. पत्रकारिता करतना मुष्टीफंड आरयनाच्या प्रशासकांचे, संचालकांचे, मुख्याध्यापकांचे वळखींतल्यान आमकांय खूब शिकपाक मेळ्ळें. नीट, जेईई ची विस्कावणी करून सांगपी आपले परस संस्थेक, विद्यार्थी, पालकांक प्रसिद्धी दिवची अशी विनवणी करपी मुष्टीफंड आर्यनाच्या सरांक सलाम. दिसाळ्यांतल्या खबरांचो आल्बम तांचे कडेन आसतलो, स्कुलाच्या फळ्यार खबरेचीं कात्रणां लावन तीं भुरग्यांक वाचूंक लावप, स्कुलांत आयिल्ल्या व्यक्तीमत्वांक प्रस्न विचारप, खबरो बरोवपय मुष्टीफंड आरयनात शिकयतात.
पत्रकारांनी दिल्ली, मेळिल्ली खबर तपासप (दोतोराची तपासणी न्हय), घरा वतना नदर मारप हें खबरेकारांचेच न्हय पान संपादपी, वृत्तसंपादकाचें काम. हे यंत्रणेंत आयज दिसाळ्यांतल्या भोवमाध्यमी युगांत बदल जाल्यात, ल्हान व्हड जातात तेन्ना तांकां सकाळ, दनपार, रात म्हणल्यार कितें हाची माहिती आसपाक जाय. गोमन्तक दिसाळ्यांत शुद्धलेखन, सकाळ, दनपार, रात म्हणल्यार वेळाच्यो चुकी नासतल्यो हे खातीर नित्य मार्गदर्शन करपी पत्रकार जयंत संभाजी हेय आमचे गुरूजी. दनपारच्या 4 वरांचेर सांजवेळ सुरू जाता आनी रातीं 8 वरांचेर सोंपता, उपरांत 8 ते 12 रात, मागीर उदेंत, सकाळ, दनपार ही दिसपटी तांचीच.
दिसाळ्यांनी दिसपटेक म्हत्व चड, उपसंपादप्याच्या वावराचें नियोजनय थंयच जाता. उपसंपादपी भोवमाध्यमांतल्यान वावर करतात, दिसाळ्यांनी माहिती तंत्रज्ञान, मनीसबळ विभागय आयला. तंत्र वेगळें, मंत्र वेगळे आसत पूण शेंकड्यांनी हात एकठांय येवनूच दिसाळें भायर सरता. खबराकारांक, फोटोग्राफरांकय दिसपटेची गरज आसली तरी दीस- रातय वावरांत रावचें पडटा. पत्रकारितेची फुडली पिळगी घडयतना ती भोवमाध्यमी आसतली हें मतींत दवरून तशें शिक्षण दिवप गरजेचें. गुरुपुनवे दिसा गुरुर्ब्रह्मा गुरुर्विष्णुः गुरुर्देवो महेश्वरः गुरू साक्षात परब्रह्म हीं रुशीमुनींचीं उतरां सादीं सोंपीं
केल्यार?

सुहासिनी प्रभुगांवकार
9881099260