भांगरभूंय | प्रतिनिधी
गिमाच्या हंगामांत उश्णतायेन फोड येवप चड प्रमाणांत दिसता. ताका घामोळें, उश्णतायेचे फोड अशेंय म्हण्टात. उश्णतायेक लागून येवपी फोड फकत व्हडल्यांकच न्हय तर भुरग्यांकय ताचो त्रास जाता. भुरग्यांची कात खूब संवेदनशील आसता. अशे परिस्थितींत उश्णतायेक लागून तांका कातीचेर फोड येवप, खाज येवप सारकिल्ले त्रास जाता. पूण कांय सोंप्या उपायांनी ही समस्या पयस करूं येता.
घाम कित्याक येता?
आंग थंड करपाचो एक मार्ग म्हणल्यार घाम येवप. घामाच्या ग्रंथींत घाम तयार जाता आनी तो पुराय कुडीक पाताळता. घामाच्यो ग्रंथी कातीच्या वा खोल थरांत आसतात आनी मेंदवांतल्या तापमान नियंत्रण केंद्रांवरवीं तांचें नियंत्रण जाता. ग्रंथींतल्यान येवपी घाम नळयेंतल्यान कातीच्या पृश्ठभागाचेर वता.
घामोळें कित्याक येता?
घामाच्यो नळयो बंद जाता आनी कांतीच्या पृश्ठाचेर घाम पावूंक शकना तेन्ना उश्णतायेचेर फोड येता. ताचे बदला तो कातीच्या पृश्ठभागाखाला आडखळून पडटा आनी ताका लागून मात्शी सुज वा फोड येतात. उश्णताय फोड ही कातीची स्थिती आसून ती चड करून उश्ण आनी दमट हवामानांत भुरग्यांक आनी व्हडल्यांक जाता. जेन्ना तुमचे छिद्र बंद जातात आनी तुमकां घाम येना तेन्ना तुमकां उश्णतायेचे फोड येता जाका घामोळे म्हणटात.
भुरग्यांक उश्णताय फोड येवपाचीं कांय सामान्य कारणां
० खूब उश्ण वा दमट हवामानांत भुरग्यांक उश्णतायेचो त्रास जावं येता.
० कातीचेर आशिल्ल्या स्टॅफिलोकोकस एपिडर्मिडीस आनी स्टॅफिलोकोकस ऑरियस ह्या बॅक्टेरियाक लागून उश्णतायेचो फोड येवं शकता.
० केन्ना केन्नाय भुरग्यांच्या कातीचेर चड तेल वा क्रीम लायल्यार उश्णताय आघाताची समस्या निर्माण जावंक शकता.
० गिमाच्या दिसांनी चड घट्ट कपडे घातल्यारय भुरग्यांक उश्णताय आघात येवपाक शकता.
घामोळ्याचेर घरगुती उपाय….
१. भुरगें न्हिदिल्ल्या कुडीचें वातावरण सामान्य दवरचें.
२. भुरग्यांक काती संबंदीत कसलेय समस्या जावच्यो न्हय हे खातीर भुरग्याचे नितळसाणेची खाशेली जतनाय घेयात.
३. थंड पट्टी वा टॉवेलान भुरग्याची कूड पुसची.
४. गिमांत ल्हान भुरग्यांक चड कपडे घालचे न्हय.
५. ल्हान भुरग्यांक कांय वेळ उक्तें दवरात.
६. ताचे कातीचो घाम वा तेल निवळ कपड्यान पुसत रावचें.
७. भुरग्याचे कातीचे फोड सुदारना वा वाडत जाल्यार दोतोराचो सल्लो घेवचो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
