भांगरभूंय | प्रतिनिधी
नवें शिक्षणीक वर्स सुरू जाता आसतना सगल्यांच्याच मनांत नव्या राष्ट्रीय शिक्षणीक धोरणा विशीं उमळशीक आसा. धोरणाच्या अंमलबजावणे उपरांत जे बदल जातले ते कितले सकारात्मक आसतले, ताचेरूय सगल्यांची नदर आसा. शिक्षण धोरणांत दरेके व्यक्तीच्या सृजनशील तांकीच्या विकासाचेर खासा भर दिला. शिक्षणांत फकत गूण प्राप्त करपाचीच तांक न्हय तर विमर्शीक विचार आनी समस्या सोडोवप अशेय तरेची क्षमता आसप गरजेची. पूण तितली समाजीक, नितीक आनी भावनीक क्षमता विकसीत करची पडटली, ह्या तत्वाचेर ती आदारीत आसा. पुर्विल्ल्या आनी शाश्वत भारतीय गिन्यानाचें आनी विचारांचें गिरेस्त दायज ह्या धोरणाक मार्गदर्शक थारलां.
हें राष्ट्रीय शिक्षणीक धोरण, भारतीय नितीनेमां मदीं रुजिल्ले अशे शिक्षण प्रणालीची कल्पना करता जी भारताच्या परिवर्तना खातीर थेट योगदान दिता. भारत देश सगल्यांक उच्च गुणवत्तेचें शिक्षण दिवन, कायम स्वरूपांत एक समतोल ज्ञानाच्या समाजांत हाडपाचो यत्न करता. हे धोरण आमच्या संस्थांचे अभ्यासक्रम आनी अध्यापनशास्त्र आमचें मोलादीक दायज आनी संविधानीक मूल्यांकडेन लागीं व्हरतले. विद्यार्थी देशा कडेन जुळोवन, बदलत्या जगांत नागरिकांची भुमिका आनी लागणुके मदीं जागृताय हाडूंक शकतली. ह्या धोरणाची संकल्पना म्हणजे फकत विचारानूच न्हय तर बुद्दीन आनी करणेन तशेंच ज्ञान, कुशळटाय, मूल्यां आनी समर्थन दिवपी प्रवृत्ती विकसीत करप हे खातीर भारतीयांनी अभिमान बाळगप ही त्या धोरणाची मोख आसा. थळाव्यो भासो, आवयभास हांकां प्राधान्य दिवप हो हेतू दवरून लेगीत ही शिक्षण पद्धत मुखार सरता.
देशांतली आवयभास आनी प्रादेशीक भासांच्या विकासाचें केंद्र, विज्ञानीक आनी तंत्रीक शब्दावली आयोग (सी. एस. टी. टी.) हांणी मायभाशेक मुखार काडपाचो वावर नेटान सुरू केला. असोच एक वावर कोंकणी भाशेंत गोंय अभियांत्रिकी महाविद्यालय (जी. ई. सी.), फर्मागुडी हांच्या जोडपालवान सुरू जाला. नवें राष्ट्रीय शिक्षण धोरणाचो प्रचार करपाक तंत्रीक शब्दावली करप सुरू आसा. इंग्लीश – हिंदी – कोंकणी अशी शब्दावली तयार करपाची जापसालदारकी म्हाविद्यालयांतले प्राध्यापक डॉ. समर्थ बोरकार हांणी खांदार घेतल्या. कोंकणी शब्दावली तयार करपा खातीर फर्मागुडी
जी. ई. सी. हांगां कार्यशाळा आयोजीत
केल्ली.
इलॅक्ट्रॉनिक्स विभागांत सहयोगी प्राध्यापक डॉ. बोरकार हांचें आनी कोंकणीचें नातें दीर्घ आसा. तांणी कोंकणी तशीच इंग्लिश भाशेंत साबार पुस्तकां उजवाडाक हाडल्यात. आदल्या प्रसंगांनी तांणी कोंकणींत, मुळावें इलेक्ट्रॉनिक्स नांवाचें तंत्रीक पुस्तक उजवाडायलां. तशेंच तें नेमान आपलें काम ऑनलायन मोडांत उजवाडाक हाडटा. ही जापसालदारकी पुराय करपाखातीर ते आपल्या सांगात्या सयत वावुरतात. अभियांत्रिकी अभ्यासक्रमां खातीर सुमार 2850 इंग्लीश उतरां कोंकणींत हाडपाची गरज आशिल्ली. ते खातीर काय सुवातींचेर कोंकणी उतर उपलब्द आशिल्लें, पूण कांय कडेन कोंकणींत नवीं उतरां तयार करपाचोय भार हांगा जाणकारांनी सांबाळ्ळा. हे संदर्भांतली पयली बसका गोंय विद्यापिठाच्या गोवा बिझनेस स्कूलांत जाल्ली. थंय जाणकारांनी दर एका उतरा खातीर वेगळें उतर घडोवन दिल्लें. 12 ते 16 जून जाल्ले हे दुसरे बसकेंत / कार्यशाळेंत तज्ञांनी 2850 उतरांची परत तपासणी केली आनी फावो थंय बदल आनी नवीं उतरां लेगीत सुचयिल्लीं आसा. ही संद गोंय खातीर पयलेच खेपे मेळ्ळ्या आनी जाणकारांनी हे संदीक पुराय न्याय दिला अशें म्हणू येता.
हे कार्यशाळेंत इलॅक्टॉनिक्स, कोंकणी आनी संस्कृत भाशाशास्त्रज्ञांनी वांटो घेतिल्लो. केंद्रीय मंत्रीमंडळान मान्यताय दिल्ल्या NEP 2020 खातीर शिक्षण क्षेत्रांत नेटान बदल जायत आसात. मुख्यमंत्री डॉ. प्रमोद सावंत हांणी लेगीत गोंयांत नवें धरण लागू करपाक पेंगट बांदलां. गोंय हें नव्या धोरणाची अंमलबजावणी करपाक अग्रेसर आशिल्ल्या राज्यां मदलें एक राज्य. भारतीय समाजाच्या गरजे प्रमाण अभ्यासक्रम करप, तंत्रीक शिक्षणांत नवे आनी गरज आशिल्ले बदल तशेंच सुदारणा करप हाकाय मुख्यमंत्र्यांनी प्राधान्य दिलां. 16 जूनाक डॉ. सावंत हांणी वेळांत वेळ काडून ह्या पुराय पंगडाची भेट घेतली. तांणें सांगलें, दर एकल्यान मुखार येवन आपले पद्दतीन राष्ट्रीय शिक्षणीक धोरण 2020 मुखार व्हरपाक योगदान दिवपाक जाय. तशेंच अशे तरेच्या प्रकल्पांक गोंय सरकारावतीन पुराय तेंको मेळटलो कारण कोंकणी भाशेकडली आमची ही लागणूक. ह्या बसकेक शिक्षण सचीव लोलयेंकार, डॉ एम एस कृपाशंकर (प्राचार्य, गोंय अभियांत्रिकी महाविद्यालय), आनी तज्ञ वांगडी हाजीर आशिल्ले.
इलॅक्ट्रॉनीक अभियांत्रिकींतली पदवी, पदव्युत्तर अभ्यास केल्ले जाणकार हे समितींत आशिल्ले. पयली बसका 20 ते 24 मार्च ह्या दिसांनी गोंय विद्यापिठांत घडिल्ली. प्रो. ज्योती पवार ह्यो समन्वयक आशिल्ल्यो.
कोंकणी शब्दावली तयार करपा खातीर जी. ई. सी. हांगां कार्यशाळा आयोजीत केल्ली. त्या वेळार जे. एस. रावत हे आयोगाचे सहाय्यक संचालक आशिल्ले. डॉ. समर्थ बोरकार समन्वयक जाल्यार सहाय्यक प्राध्यापक मंगीश देसाय जोड समन्वयक आशिल्ले. ह्या पांच दिसांचे बसकेंत तज्ञ समितीच्या वांगड्यां मदीं इलॅक्ट्रॉनिक्स विशयाक चेतन देसाय, स्त्रिग्धरा नायक, श्रुती आडपयकार, श्रीनिवास जोशी हांणी भोवमोलादीक योगदान दिलें. तशेंच कोंकणी विशया खातीर प्रो. किरण बुडकुले, डॉ. भूषण भावे, दामोदर घाणेकार, रमा मुरकुंडे, एडना वाज फर्नांडीस, सुशांत नायक, उर्वशी नायक हांचें भोव मोलादीक सहकार्य लाबलें.
हो पुराय वावर करप हे समिती खातीर सहज जावपी गजाल नाशिल्ली. कारण ज्या विशयांतली शब्दावली करतात त्या विशयाक धरून नेमकें उतर थंय येवप गरजेचे आशिल्लें. हे खातीर खंयचोय मुद्दो आसूं, यंत्र वा उपकरण आसूं तें कितें हें समजले बगर फुडें वचप शक्य नाशिल्लें. देखून दर एक विशय समजप, ताका कोंकणी उतर सुचोवप आनी परत त्या कोंकणी उतराचो अर्थ समजून तें उतर लागता जाल्यार घेवन मुखार वचप नाजाल्यार परत ते तपासणे खातीर दवरप ह्या दीर्घ प्रक्रियेंतल्यान ही शब्दावली जाता ही कोंकणी खातीर एक भोव म्हत्वाची गजाल आसा.
फुडाराक शास्त्रीय आनी तंत्रीक परिभाषा उत्क्रांतींत व्यापक काम हातांत घेतले अशें जय सिंग रावतान आमकां कळयलां. दूरसंचार आनी प्रसारण अभ्यासक्रमाच्या मळार आनी ताचे उपरांत हेर मुखेल अभियांत्रिकी विशयांत हो पंगड बेगीनूच असोच काम हातांत घेतलो अशें तांणी मुख्यमंत्र्यांचे बसकेंत म्हटलें.
ह्या कामाक आतां आशादायक सुरवात जाल्या. कारण NEP 2020 नव्या अभ्यासक्रमाची मागणी विद्यार्थ्याच्या नदरेन, जो तांच्या आवडीचो करिअर मार्ग वळखुपाक आनी चालीक लावपाक फावो ती संद
दितलो.
मीतेश मंगेश पडते
98235 52228
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
