भांगरभूंय | प्रतिनिधी
शॅककारांचें पर्यटन खात्याक पत्र
म्हापशें: कळंगूट आनी कांदोळे दर्यादेगे वयलो कोयर कंत्राटदार नेमान उबारना. हाचो परिणाम दर्यादेगेर घाणीची समस्या निर्माण जाल्या.
हो प्रस्न गोंय शॅक धनी कल्याण सोसायटी वतीन अध्यक्ष क्रुझ कार्दोज हांणी पर्यटन मंत्री आनी पर्यटन संचालकांक लेखी निवेदन सादर करून हाचे कडेन लक्ष ओडलां.
दर्यादेगेर नितळसाण कंत्राटदारान कळंगूट आनी कांदोळी दर्यादेगे वयलो कोयर उबारपा खातीर सद्या अनियमीतपण चलयलां. हाका लागून दर्यादेगेर कोयर सांचून उरला. हे विशीं संबंदीत कंत्राटदाराक विचारल्यार वाहन नादुरुस्त आशिल्ल्याचें कारण दिता.
तशेंच ह्या कोयराक लागून गोंयचें नांव पेड्डेर जायत आसा. कारण कळंगूट हें पर्यटनाचें मुखेल केंद्र आसा. अशे तरेन दर्यादेगेर सांचून उरपी कोयराक लागून पर्यटकां मदीं चुकीचो संदेश वता. हे खातीर दर्यादेगेर कोयराचें योग्य वेवस्थापन करचें अशी मागणी ह्या सोसायटीन निवेदनांतल्यान केल्या.
वाहन नादुरुस्त जाल्यार सेवेंत आडखळ येवची ना हाची खबरदारी कंत्रादारान घेवंक जाय. पर्यायी येवजण आसूंक जाय. ताका लागून संबंदीत कंत्राटदाराक गरजेची सुचोवणी दिवपाचें निर्देश दिवचे आनी ही समस्या ताकतिकेन सोडोवची अशी मागणीय ह्या निवेदनांतल्यान केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
