भांगरभूंय | प्रतिनिधी
म्हापशें ः गौरावाडो- कळंगूटे दोन शॅकांक उजो लागिल्ल्यान लुकसाण जालें. नव्या वर्साच्या येवकारा खातीर सकाळ जाय मेरेन दर्यादेग वाठारांत फोग मारप चालूच आशिल्लें. ताची किटी शॅकांचेर पडिल्ल्यान ही घडणूक घडिल्ल्याचो अदमास आसा.
ही घडणूक बुधवार १ जानेवारीक सकाळीं ६.४५ घडली. मेल्विन सिक्वेरा आनी कटरिना फर्नांडीस हांच्या ह्या दोन शॅकांक उजो लागलो.
हे घडणुकेंत शॅकांच्या मुखारच्या भागांतलें सामान लासलें. हातूंत खुर्च्यो, टेबल, बेड, हेर लाकडाचें सामान, लायटीचें सामान, सीसी टीव्ही कॅमेरे, बांबू, प्लास्टीक आनी माडाचीं चुडटां हांचो आसपाव आसा. ह्या उज्याक लागून सुमार ५ लाखांचें लुकसाण जाल्ल्याचो अदमास आसा. शॅक धनयांनी सांजवेळ मेरेन लुकसाणेचो अहवाल उजो पालोवपी दळाक दिवंक नाशिल्लो.
घडणुकेची म्हायती मेळटांच पिळर्ण उजो पालोवपी दळाचे जवान घडणुके सुवातेर आयले. तो मेरेन शॅकचे कामगार आनी आशिकुशीकच्या लोकांनी उदक मारून उजो पालयल्लो. दळाचे अधिकारी दामोदर पेडणेंकार हांच्या मार्गदर्शना खाला हवालदार नरेंद्र शेटये हांणी सहकार्यां सयत घडणुके सुवातेर भेट दिवन पळोवणी केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
