भांगरभूंय | प्रतिनिधी
फाटल्या साडेचार वर्सांत 1,364 कोटींचें 718 जमीन वेव्हार
पणजी: आसगांवां आगरवाडेकार कुटुंबाचे घर जेसीबी आनी बावन्सर घालून मोडिल्ल्या प्रकरणाचो उजो पालवता आसतनाच फाटल्या साडेचार वर्सांत आसगांवां सुमार 1,364 कोटींचें 718 जमनी वेव्हार (सेलडीड) जाल्ल्याचें मुखार आयलां. सरकारी आंकडेवारी प्रमाण आसगांवांतले हे वेव्हार 1,364 कोटींचे आसले, तरी पड्ड्या फाटलो वेव्हार चार हजार कोटीं परस चड आशिल्ल्याचें थंयच्या जमनींच्या दरा वेल्यान नदरेक येता. ह्यो जमनी विकत घेवपी गोंया भायल्यांची संख्या चड आशिल्ल्याचेंय राज्य सरकारान जारी केल्ले आंकडेवारी प्रमाण मुखार आयल्या.
फाटल्या साडेचार वर्सांत देशांतल्या विवीध राज्यांतल्या तशेंच विदेशांतल्या 922 जाणांनी गोंयांत सुमार 718 ‘सेलडीड’ केल्यांत. तातूंत आसगांवां 4,93,361 चौरस मिटर जमीन क्षेत्रांत सुमार 1,364 कोटी रुपयांचो अर्थीक वेव्हार जाल्ल्याचें आनी तातूंतल्यान गोंय सरकाराक 100.92 कोटी रुपयांचो महसूल मेळिल्ल्याचें मुखार आयलां. ह्या महसुलांत जमीन आनी हेर मालमत्तेंची विक्रीची स्टॅम्प ड्युटी 60.06 कोटी आनी 40.86 कोटींचें नोंदणी शुल्क हांचो आस्पाव आसा.
राज्य सरकाराच्या आंकडेवारी प्रमाण बार्देस म्हालांतल्या आसगांव वाठारांत 2020 वर्सा फक्त 85 ‘सेलडीड’ची नोंद जाल्ली. ते प्रमाण 61,260 चौरस मिटर जमीन आनी हेर मालमत्तेंची विक्री जाली. ते खातीर 106.83 कोटींचो अर्थीक वेव्हार केलो. ह्या वेव्हारांतल्यान राज्य सरकाराक 4.22 कोटी रुपयांची स्टॅम्प ड्युटी आनी 3.80 कोटी रुपयांची नोंदणी शुल्क मेळून सुमार 8.02 कोटी रुपयांचो महसूल मेळिल्लो. उपरांत 2021 वर्सा आसगांव वाठारांतल्या जमनीची मागणी वाडली. थंयची जमीन विकती घेवपाक चडांत चड गोंया भायले मुखार सरले. ताका लागून 2021 वर्सा 172 ‘सेलडीड’ नोंद जाल्यो. त्या काळांत 1,33,692 चौरस मिटर जमीन आनी हेर मालमत्तेंची विक्री जाली. ते खातीर 352.39 कोटी रुपयांचो अर्थीक वेव्हार केलो.
ह्या वेव्हारांतल्यान सरकाराक 13.20 कोटी रुपयांची स्टॅम्प ड्युटी आनी 11.33 कोटी रुपयांचें नोंदणी शुल्क अशें मेळून सुमार 24.53 कोटी रुपयांचो महसूल मेळ्ळो. 2021 चे तुळेन 2022 वर्सा आसगांवांतले जमनीचें मोल मळबाक तेंकलें. ते प्रमाण थंयचे जमनींची मागणीय वाडली.
ह्या वर्सांत थंय 222 ‘सेलडीड’ नोंद जाल्यात. तातूंत 1,19674 चौरस मिटर जमीन आनी हेर मालमत्तेंची विक्री केली. ते खातीर 378.45 कोटी रुपयांचो अर्थीक वेव्हार जालो. तातूंतल्यान गोंय सरकाराक 14.47 कोटी रुपयांची स्टॅम्प ड्युटी आनी 11.44 कोटी रुपयांची नोंदणी शुल्क मेळून सुमार 25.91 कोटी रुपयांचो महसूल मेळ्ळो.
ह्याच काळांत बनावट कागदपत्रां तयार करून जमनीचो वेव्हार जाता अशें उक्तडार आयले उपरांत सरकारान 15 जून 2022 दिसा विशेश तपास पंगड (एसआयटी) स्थापन केल्लो. तशेंच हडप केल्ल्या जमनीं विशीं कायदेशीर निर्णय घेवपाक 9 सप्टेंबर 2022 दिसा निवृत्त न्यायाधीश व्ही. के. जाधव हांणी एक वांगडी चवकशी आयोग स्थापन केलो. ताका लागून आसगांव वाठारांतले जमनीचो वेव्हार कांय प्रमाणांत थंड पडलो. 2023 वर्सा फक्त 184 ‘सेल डीड’ नोंद जालें. तातूंत 1,27,054 चौरस मिटर जमीन आनी हेर मालमत्ता विकल्यात. ते खातीर 356.05 कोटी रुपयांचो अर्थीक वेव्हार केल्लो. ह्या वेव्हारांतल्यान सरकाराक सुमार 27.13 कोटी रुपयांचो महसूल मेळ्ळो, तातूंत 18.15 कोटी रुपया मुद्रांक शुल्क आनी 8.98 कोटी रुपया नोंदणी शुल्क हांचो आस्पाव आसा.
2024 वर्सा 30 जून मेरेन फक्त 55 ‘सेल डी’ नोंदणी जाल्यात, तातूंत 51,681 चौरस मिटर जमीन आनी हेर मालमत्ता विकल्यात. ते खातीर 171.13 कोटी रुपयांचो अर्थीक वेव्हार केल्ल्याचें उक्तडार आयलां. ह्या वेव्हारांतल्यान सरकाराक सुमार 15.30 कोटी रुपयांचो महसूल मेळ्ळो, तातूंत 10.01 कोटी रुपया मुद्रांक शुल्क आनी 5.29 कोटी रुपया नोंदणी शुल्क हांचो आस्पाव आसा.
सगल्यांत चड जमीन कोणें घेतली?
– आसगांवांतल्यो चडश्यो मालमत्ता दिल्लीकारांनी विकत्यो घेतल्यात. सरकारी डाटा प्रमाण दिल्लींतल्या 379 जाणांनी आसगांवां जमीन विकती घेतल्या
– मुंबयच्या 187, हरयाणाच्या 74, हैदराबादेंतल्या 24, उत्तर प्रदेशांतल्या 22, पुण्यांतल्या 18, कर्नाटकांतल्या 36 आनी हेर राज्यांतल्या 44 जाणांनी आसगांवां मालमत्ता घेतल्या. आसगांवां फक्त 168 गोंयकारांनी जमीन खरेदी केल्या.
विदेशांतल्यान कितल्या लोकांनी आसगांवां जमीन विकती घेतल्या ?
देश संख्या
अमेरिका 9
इंग्लंड 8
कॅनडा 4
ऑस्ट्रेलिया 2
पुर्तुगाल 2
सिंगापूर 2
चीन 2
बेल्जियम 1
जर्मनी 1
स्पेन 1
मॉरिशियस 1
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
