भांगरभूंय | प्रतिनिधी
पणजीः तमिळनाडू, कर्नाटक आनी मध्य कोंकण हांचे मदीं तयार र्देणीय पट्टो आनी हेर वातावरणीय बदलांक लागून आयज आनी फाल्यां (४ एप्रील) राज्यांत पावस पडपाची शक्यताय हवामान खात्यान उक्तायल्या. ह्या दोन दिसांनी दनपारां उपरांत गडगडा वांगडा पावस पडपाची शक्यताय आसा.
शुक्रारा राज्यांतल्या कांय वाठारांनी दमट आशिल्ली. चडांत चड आनी उण्यांत उणें तापमान वाडत वचत उश्णताय जाणवताली. शुक्रारा पणजेचें तापमान चडांत चड ३४.२ अंश, जाल्यार उण्यांत उणें तापमान २३.८ अंश आशिल्लें. मुरगांवांत चडांत चड तापमान ३४ अंश आनी उण्यांत उणें तापमान २४.४ अंश आशिल्लें. राज्यांत चडांत चड तापमान ३३ ते ३४ अंश आसपाची शक्यताय आसा, जाल्यार फुडल्या स दिसां खातीर उण्यांत उणें तापमान २४ ते २५ अंश सेल्सियस आसपाची शक्यताय हवामान खात्यान उक्तायल्या. ५ ते ९ एप्रील ह्या काळांत राज्यांत हवामान सुकें उरपाची शक्यताय आसा.
फाटल्या २४ वरांत राज्यांत सरासरी १.२ मिलिमीटर पावस पडला. ह्या काळांत साखळे ६.२ मिमी., धारबांदोड्यां ४.२ मिमी., वाळपय २.५ मिमी., सांग्यांर २.३ मिमी., पोरणें गोंयां १.१ मिमी. हाचे आदीं खात्यान एप्रील ते जून मेरेन तीन म्हयन्यांचो हवामान अदमास जारी केला. ते प्रमाण ह्या काळांत राज्यांत सरासरी परस चड पावस पडटलो असो अदमास आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
