भांगरभूंय | प्रतिनिधी
‘उटा’ संघटणेच्या द्विदसकपुर्ती सुवाळ्यांत मुख्यमंत्री डॉ. प्रमोद सावंत हांची हमी
फर्मागुडयेर जाल्ल्या सुवाळ्यांत समाजभावांचो बरो प्रतिसाद
फोंडें: सूर्य, चंद्र आस मेरेन भारतीय संविधानाक कोणूच हात लावंक शकना. राज्याचो कारभार संविधाना प्रमाणूच चलतलो. संविधानान आदिवासी समाजाक दिल्ले सगले अधिकार मेळोवन दितले अशी हमी मुख्यमंत्री डॉ. प्रमोद सावंत हांणी दिली.
‘उटा’ संघटणेच्या द्विदसकपुर्ती सुवाळ्या निमतान फर्मागुडी- फोंड्यां आयतारा आयोजीत केल्ल्या सुवाळ्यांत मुखेल सोयरे ह्या नात्यान ते उलयताले. मंत्री गोविंद गावडे, ‘उटा’चे अध्यक्ष तशेंच आदले मंत्री प्रकाश वेळीप, आमदार आंतोन वास, अनुसुचीत जमाती (एसटी) वित्त आनी विकास म्हामंडळाचे अध्यक्ष वासुदेव मेंग गांवकार बी मानेस्त हाजीर आशिल्ले.
आदिवासी समाजाचो सर्वांगी विकास साध्य करपा खातीर सगल्यांत पयलीं समाज भावांनी संघटीत रावप गरजेचें आसा. आदिवासी समाजांत फूट पडची न्हय, ह्या समाजाचो विकास जावचो, हे खातीरचे यत्न मुख्यमंत्री ह्या नात्यान आपूण करीत आसां. गोंय मुक्ती उपरांत एसटी दर्जो मेळोवपा खातीर आदिवासी समाजाक 40 वर्सां संघर्श करचो पडलो, निमाणें 2003 वर्सा केंद्रांतल्या त्या वेळा वेल्या भाजप सरकारान आदिवासी समाजाक हो न्याय मेळोवन दिलो. केंद्र आनी राज्यांतल्या सद्याच्या भाजप सरकारान गोंयांतल्या आदिवासी समाजाचे खूबशे प्रस्न सोडयल्यात. विधानसभा वेंचणुकेंतल्या आदिवासी राजकी आरक्षणाचो प्रस्न केंद्र सरकारान सोडयला. संसदेच्या येता त्या अधिवेशनांत ते विशींचो थाराव मंजूर करतले आनी फुडले 2027 चे विधानसभा वेंचणुकेंत एसटी समाजाक निश्चीत राजकी आरक्षण दितले अशी हमी मुख्यमंत्री डॉ. सावंत हांणी दिली.
राज्यांत आदिवासी भवन उबारपाची प्रक्रिया कांय कारणांक लागून रखडली. पूण 2027 मेरेन आदिवासी भवनाची उबारणी करतले. ‘आदिवासी सबप्लान’ खाला फाटल्या अर्थसंकल्पांत दरेक खात्याक 12 टक्के निधी दिला. ह्या निधीचो पुरेपूर वापर करपाचे निर्देशूय खात्यांक दिल्यात. रानहक्क कायद्या प्रमाण आदिवासींक जमनी मेळोवन दिवपाची प्रक्रिया आपल्याच सरकारान सुरू केली. हे प्रक्रियेक फुडल्या काळांत आनीक गती दितले अशें तांणी म्हणलें.
केंद्र आनी राज्य सरकारा खातीर भारतीय संविधान सर्वोच्च स्थानार आसा. संविधान दुरुस्ती विशीं विरोधी पक्ष फक्त राजकारण करता. सूर्य, चंद्र आस मेरेन भारतीय संविधानाक कोणूच हात लावंक शकना. केंद्र आनी राज्य सरकार संविधाना प्रमाणूच काम करीत आसा. संविधानाचो सगल्यांत माेटो अपमान 1971-72 वर्सा आदल्यो प्रधानमंत्री इंदिरा गांधी हांणी केल्लो, अशी टिकाय मुख्यमंत्री डॉ. प्रमोद सावंत हांणी केली.
राज्यांतल्या भुंयपुतांच्या न्याय हक्कां खातीर 20 वर्सां पयलीं ‘उटा’ संघटणा स्थापन केली. ह्या 20 वर्सांत बाबासाहेब आंबेडकर हांच्या संविधानान दिल्ले हक्क आनी अधिकार मेळोवपा खातीर ‘उटा’ संघटणेक संघर्श करचो पडलो. खूबशे फावटी रस्त्यार देंवचें पडलें. ज्या अदिवासी समाजान गोंयांतल्यो जमनी कसयल्यो, पिकयल्यो त्याच जमनीं वेल्यान आदिवासींक बेघर करपाचे यत्न कांय जाणां कडल्यान सद्या सुरू आसात. तांचे हे यत्न आमी केन्नाच येसस्वी जावंक दिवचे नात. फुडल्या काळांतूय संघर्श करून आमी आमच्यो जमनी मेळोवं अशें मंत्री तशेंच ‘उटा’चे समन्वयक गोविंद गावडे हांणी नमूद केलें.
गोंयांतल्या आदिवासी समाजाक भाजप सरकारान सदांच न्याय दिला. समाजाच्याे प्रलंबीत मागण्योय केंद्र आनी राज्यांतल्या भाजप सरकारान रोखड्या रोखड्यो पुराय करच्यो अशें आवाहन प्रकाश वेळीप हांणी केलें.
मजगतीं, सुवाळ्यांत आदिवासी समाजा वतीन मुख्यमंत्री डॉ. प्रमोद सावंत हांकां मुखेल मागण्यांचें अधिकारपत्र सादर केलें. तशेंच ‘आक्रोश’ हो म्हायतीपट, ‘उटा उजवाडाची वाट’ हो विशेश ग्रंथ आनी वॅबसायटीचें मुख्यमंत्र्या हस्तुकीं अनावरण केलें.
जो आमचे वाटेक येतलो ताची वाट लावं: गावडे
2008 वर्सा न्याया खातीर ‘उटा’न रथयात्रा काडली. हे यात्रेंत एसटी समाजाच्या दोन तरणाट्यांक बलिदान दिवचें पडलें. यात्रेंत वांटेकार जाल्ल्यांक बंदखणींत घाले. उपरांत सत्तेचें कदेल मेळ्ळे उपरांत कांय जाणांनी ‘उटाक खुटा’ म्हणून आमची फकांडां केली. स्वताच्या वैयक्तीक सुवार्था खातीर कांय जाण समाजाचो वापर करतात. जो आमचे वाटेक येतलो ताची वाट लायले बगर आमी ओगी बसचे नात अशें मंत्री गोविंद गावडे हांणी हे कार्यावळींत ठणकावन सांगलें.
राजकी आरक्षणाची मागणी पुराय जातली: कुलस्ते
केंद्र सरकारान आतां मेरने कर्नाटक तशेंच जम्मू-कश्मीर विधानसभेंत आदिवासींक राजकी आरक्षण दिलां. गोंय विधानसभेंतूय लोकसंख्येच्या आदाराचेर आदिवासी समाजाक राजकी आरक्षण मेळचें, हे खातीर आपूण खूबशा वर्सां सावन यत्न करीत आसां. येता ते विधानसभा वेंचणुकेंत आदिवासी समाजाक निश्चीत राजकी आरक्षण मेळटलें अशी हमी आदले केंद्रीय मंत्री तशेंच एससी, एसटी कल्याण संसदीय समितीचे अध्यक्ष फग्गन सिंह कुलस्ते हांणी दिली. राजकी आरक्षणा सयत हेर मागण्यो मान्य करून घेवपा खातीर आदिवासी समाजान संघटीत रावपाची गरज आशिल्ल्याचें तांणी म्हणलें.
—————
बॉक्स
लोकसभेंत आवाज काडटलों
राज्यांतल्या आदिवासी समाज विधानसभा वेंचणुकेंत राजकी आरक्षण मेळोवन घेवपा खातीर खूबशा वर्सां सावन संघर्श करीत आसा. ते खातीर आपूण लोकभेंत आवाज काडटलों अशें दक्षीण गोंयचे खासदार कॅ. विरियातो फर्नांडीस हांणी म्हणलें.
‘उटा’ च्यो सरकारा कडेन मुखेल मागण्यो
– डिसेंबर 2025 पयलीं राजकी आरक्षणाचें कायदेशीर सोपस्कार पुराय करात.
– आदिवासी समाजाची वस्ती आशिल्ल्यो जमनी आदिवासीं बगर हेरांक विकपाक बंदी घालात.
– रानहक्क कायदो- 2006 ची येसस्वी रितीन अंमलबजावणी करात.
– सरकारी नोकरेंत आदिवासी समाजाची राखीव पदां तत्काळ भरात, पात्र आशिल्ल्यांक बडट्यो दियात.
– आदिवासी सबप्लानची योग्य रितीन अंमलबजावणी करात.
– 2026 वर्सा बिरसा मुंडा जयंतीचे पयलीं आदिवासी भवन उबारात.
– आदिवासींच्या उत्पादन विक्री खातीर येवजण आंखात
– आदिवासीं खातीर सल्लागार कावन्सिलाची स्थापणूक करात.
– आदिवासींच्या समाजीक येवजण्यांतल्या अर्थीक लावांत वाड करात.
– शिक्षणीक येवजण्यांच्या लावा खातीर उत्पन्न मर्यादेची अट कुशीक काडात.
– काजू, नाल्ल, भात आदीं पिकां खातीरच्या आधारभूत मोलांत वाड करात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
