भांगरभूंय | प्रतिनिधी
नवी दिल्ली, खबरां संस्था ः आंबो हें सगळ्यांचें आवडीचें फळ. आंब्याक ‘फळांचो राजा’ अशेंय म्हण्टात. आंब्याचो हंगाम आतां सुरू जाला. वेगवेगळ्या वाठारांनी बाजारांत आंबो विकपाक आयला. पूण हो सुरवातीचो काळ आशिल्ल्यान आंब्याचें उत्पन्न उणें आसता आनी ताका लागून सध्या बाजारांत आंब्याचें दरय चड आसता. गोंयांत डझनाक पांच हजार रुपया दर आसा.
आंब्याचे वेगवेगळे उपेग जातात. आंबो फळ म्हणून खातात. आंब्या पसून ज्यूस, जॅम, पन्हे करतात. आंब्याच्या तोरांची चटणी, लोणचेंय करतात. भलायके खातीरय आंबो बरो अशें मानतात. आंब्यांत जीवनसत्वां भरपूर आसतात. देशांत दर वर्सा व्हड प्रमाणांत आंब्याचें उत्पादन जाता. भारतांतल्यान जायत्या देशांनी आंब्याची निर्यात जाता.
आंब्याच्या उत्पादनांत पयली पांच राज्यां खंयचीं?
१. उत्तर प्रदेश
भारतांत सगळ्यांत चड आंब्याचें उत्पादन उत्तर प्रदेशांत जाता. उत्तर प्रदेशांतलें वातावरण आंब्याच्या उत्पादना खातीर बरें आसता. आंब्याच्या बागायते खातीर थंयची माती आनी उदक बरें आसता. देखूनच देशांत चडांत चड आंब्याचें उत्पादन थंय जाता. देशांतल्या वट्ट आंब्याच्या उत्पादनांत उत्तर प्रदेशांत वट्ट 20.85 टक्के आंब्याचें उत्पादन जाता. उत्तर प्रदेशांतल्यान दर वर्सा व्हड प्रमाणांत आंब्याची निर्यात जाता.
२. आंध्र प्रदेश
आंब्याच्या उत्पादनांत आंध्र प्रदेश दुसरें सुवातेर आसा. आंध्र प्रदेशांत आंब्याचे व्हड उत्पादन जाता. आंध्र प्रदेशांतल्या आंब्यांक ताच्या सुगंद आनी गोड रूचीक लागून वळखतात. देशांतल्या वट्ट आंब्याच्या उत्पादनांत आंध्र प्रदेशांत 20.04 टक्के आंब्याचे उत्पादन जाता.
३. बिहार
आंब्याच्या उत्पादनांत उत्तर प्रदेश आनी आंध्र प्रदेशा उपरांत बिहार तिसऱ्या क्रमांकाचेर आसा. देशांतल्या वट्ट आंब्याच्या उत्पादनांत बिहारांत 11.19 टक्के आंब्याचे उत्पादन जाता.
४. कर्नाटक
बिहारा उपरांत आंब्याच्या उत्पादनांत कर्नाटक चवथे सुवातेर आसा. देशांतल्या वट्ट उत्पादनांत कर्नाटक राज्यांत 8.06 टक्के उत्पादन जाता.
५. तमिळनाडू
आंब्याच्या उत्पादनांत कर्नाटक उपरांत तमिळनाडूचो क्रमांक आसा. हांगा दर वर्सा 5.65 टक्के आंब्याचें उत्पादन जाता.
पांच राज्यांनी मेळून आंब्याचें उत्पादन 65 टक्के
मजगतीं, देशांतल्या उत्तर प्रदेश, आंध्र प्रदेश, बिहार, कर्नाटक आनी तमिळनाडू ह्या पांच राज्यांनी मेळून वट्ट आंब्याच्या उत्पादनांतल्यान 65 टक्के आंब्याचें उत्पादन जाता. म्हळ्यार फकत 35 टक्के आंब्याचें उत्पादन हेर राज्यांनी जाता. महाराष्ट्रांतय आंब्याचें उत्पादन व्हड प्रमाणांत जाता. कोंकण वाठार आंब्याच्या उत्पादनांत मुखार आसा. ह्या पांच राज्या उपरांत गुजरात, महाराष्ट्र, ओडिसा, मध्यप्रदेश हांचो क्रमांक लागता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
