भांगरभूंय | प्रतिनिधी
म्हापशें प्रिपेड टॅक्सी धनी संघटणेचें मुख्यमंत्र्याक निवेदन
म्हापशें: नव्या बस स्टॅण्डार आंतरराज्य बशी रावनासतना मुखेल रस्त्या भायरूच कार्व्हालो पेत्रोल पंपा कुशीक रावतात. हाका लागून आमच्या वेवसायाचेर परिणाम जाता. हे संबंदी थळाव्या म्हापशें प्रिपेड टॅक्सी धनी संघटणेन मुख्यमंत्र्याक निवेदन सादर केलां आनी हातूंत लक्ष घालपाची मागणी केल्या.
सद्या आंतरराज्य बशी नव्या कदंब बस स्टॅण्डार प्रवेश घेनात. हाचे बदला ते प्रवाश्यांक मुखेल रस्त्या वयल्या कार्व्हालो पेत्रोल पंपा कुशीक देंवयतात. आमचे प्रिपेड टॅक्सीकारांचे स्टॅण्ड हें नव्या बस स्टॅण्डार आसा. पूण आंतरराच्य बशी बस स्टॅण्डार येनाशिल्ल्यान प्रवाश्यांचें भाडें मेळना आनी आमच्या वेवसायाचेर परिणाम जाता. तशेंच मुखेल रस्त्यार कांय पर्यटक टॅक्सी रिक्षा आनी खाजगी वाहनां रावतात. ताका लागून रस्तो ब्लॉक जायत आसून येरादारीची कोंयडी जाता अशें ह्या निवेदनांत प्रिपेड टॅक्सी धनी संघटणेन म्हणलां.
मजगतीं, बंगळुरू, पुणें, मुंबय ह्यो आंतरराज्य बशी ह्या नव्या कदंब बस स्टॅण्डार येनाशिल्ल्यान प्रिपेड टॅक्सी वेवसायाचेर आनी आमच्या अर्थ वेवस्थेचेर परिणाम जायत आसा. कारण अपेक्षीत भाडीं मेळनात. ताका लागून मुख्यमंत्र्यांनी हातूंत लक्ष घालचें अशी विनंती ह्या निवेदनांतल्यान केल्या.
ह्या निवेदनाच्यो प्रती येरादारी मंत्री, येरादारी संचालक, सहाय्यक संचालक म्हापशें, म्हापशेंचे आमदार आनी म्हापशें येरादारी पुलीस निरिक्षकांक धाडून दिल्यात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
