भांगरभूंय | प्रतिनिधी
मॉवीन गुदिन्होः तीन दिसांच्या समिटाचो समारोप
पणजी: व्हायब्रंट गोवा फावंडेशना वतीन आयोजीत केल्ल्या तीन दिसांचो ‘अमेझिंग गोवा बिझनेस समीट 2024’ चो फक्त भारतांतल्याच न्हय जाल्यार संवसारभरांतल्या नव्या उद्देजकांक मोटो फायदो मेळ्ळा. फुडारांत उद्देग उबारपा खातीर ह्या समिटाचें म्हत्वपूर्ण योगदान आसतलें अशें उद्देग मंत्री मॉवीन गुदिन्हो हांणी सांगलें.
‘अमेझिंग गोवा बिझनेस समीट 2024’ च्या आयतारा आयोजीत केल्ल्या समारोप सुवाळ्यांत मुखेल सोयरे ह्या नात्यान ते उलयताले. ह्या वेळार तांचे सयत व्हायब्रंट गोवा फावंडेशनाचे अध्यक्ष नितीन कुंकळयेंकार, उद्देजक राजकुमार कामत, जगत शाह बी मानेस्त हाजीर आशिल्ले.
फाटल्या तीन दिसां सावन गोंयांत आयोजीत ‘अमेझिंग गोवा बिझनेस समीट 2024’ त 51 देशांनी वांटो घेतिल्लो. ह्या देशांतल्या उद्देजकांनी अभिनव प्रयोग ह्या समिटांत सादर केले. विवीध देशांतले उद्देजक हातूंत वांटेकार जाल्ल्यान उद्देग उबारणी खातीरच्या विचारांचे एकामेकां भितर आदान-प्रदान जालें आसून, ताचो फायदो फुडारांत सगल्यांकूच मेळटलो असो विस्वास मंत्री गुदिन्हो हांणी उक्तायलो.
‘अमेझिंग गोवा बिझनेस समीट 2024’ नव्या उद्देजकां खातीर व्हड संद आशिल्ली. उद्देग मळार करियर करूंक सोदप्यांनी ह्या संदीचो लाव घेतला आनी तांकां ताचो फायदो निश्चीतपणान मेळटलो अशेंय तांणी म्हणलें.
मजगतीं, गोंयचो सगलेच बाबतींत गतीन विकास जायत चल्ला. ताका लागून संवसारभरांतले खूबशे उद्देजक उद्देग स्थापन करपा खातीर गोंयाक प्राधान्य दीत आसात. फुडल्या काळांतूय गोंयांत येवपी उद्देगांनी वाड जावन ताचो फायदो राज्याच्या अर्थीक उदरगती खातीर जातलो. ह्या उद्देगांक लागून रोजगारांतूय वाड जातली. ताचो फायदो थळाव्यांक मेळटलो अशेंय तांणी म्हणलें.
‘एमपीटी’ वेल्या क्रुझ टर्मिनलाक येवकार
मुरगांव पोर्ट ट्रस्टार (एमपीइी) येता त्या क्रुझ टर्मिनलाक सरकार येवकार दिता. ह्या टर्मिनलाचो राज्यांतल्या पर्यटनाक मोटो फायदो जातलो. केंद्रीय रस्ते म्हामार्ग मंत्री नितीन गडकरी हांणी दाबोळी विमानतळ ते वेर्णें जंक्शना मेरेनच्या सुमार 800 कोटी खर्चाच्या उड्डाणपुलाकूय मंजुरी दिल्या. ताका लागून मुरगांवां क्रुझ टर्मिनल येत जाल्यार ताचो सर्वसामान्य लोकांचेर कसलोच परिणाम जावचो ना अशें मंत्री मॉवीन गुदिन्हो हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
