भांगरभूंय | प्रतिनिधी
एक कील हेराॅयनाचें (ड्रग्स) मोल आंतरराष्ट्रीय बाजारांत सादारण पांच कोटी रुपयांच्या आसपास आसता. हेर घुंवळे वखदांय म्हारग. म्हणल्यार ‘एक मूठ लाखाची’ म्हणू येता. मोह जावप हो मनशाचो सभावगुण. कांय जाणांक झटपट गिरेस्त जावपाची उमळशीक लागिल्ली आसता. ते खातीर ते मागीर खंयचोय मार्ग आपणावपाक फाटीं फुडें पळयनात. आमच्या गोंयांत सगलें झकपक. चडशे फिदाल्ग वृत्तीचे. मागीर तातूंतले कांय जाण घुंवळे वखदांच्या धंद्यांत देंवतात आनी कांय म्हयन्यां भितर म्हारग्या गाडयांनी भोंवतात, खातात, पितात, मजा करतात….. नोकरी, वेवसाय कसलो करतात? कोणाक खबर ना. आशीकुशीक असले खूब तरणाटे दिश्टी पडटात. सगलेच बेकायदो धंदो करतात, अशें कोणूच म्हणचो ना. मात ‘दाल मे कुछ काला है’ असो दुबाव येवपा सारकी परिस्थिती कांय जाणांचे बाबतींत आसा, हें न्हयकारपाक जावचें ना. मंगळारा हैदराबाद पुलिसांनी गोंयचेर एक बाॅम्बगुळो घाला. तो म्हणल्यार तांणी गोंयांतल्या 7-8 जाणांचेर घुंवळे वखदां प्रकरणांत गुन्यांव दाखल केला. (एकूण 174) हातूंत गोंयांतल्या व्हड क्लब धनयांचो आसपाव आसा, अशें कळटा. म्हणल्यार हें सगलें प्रकरण दर्यादेगे वयलें आसतलें.
मेळिल्ले म्हायती प्रमाण, हैदराबाद पुलिसांनी फोंडेच्या प्रितेश नांवाच्या एका तरणाट्याक खंय 1 आॅगस्टाक हणजुण्यां धरलो. तेंय बी गोंय पुलिसांक कांयच कळयनासतना. उपरांत ताच्या घरच्यांनी तो बेपत्ता जाला, अशी कागाळ हणजुण पुलिशेंत केली. तेन्ना सीसीटीव्ही कॅमेऱ्याचे फुटेजींत ताका गाडयेंतल्यान हैदराबादाक व्हरतात तें दिसलें. ते वटेन हैदराबाद पुलिसांनी ‘प्रितेश आमच्या ताब्यांत आसा’, अशें ताच्या घरच्यांक कळयलें. 31 मार्चाच्या घुंवळे वखदां तस्करीच्या प्रकरणांत ताका ताब्यांत घेतिल्लो. आतां चवकशे उपरांत ताका अटक केल्या. आठ जाणांचीं नांवां ताणें सांगल्यांत. फुडल्या कांय दिसांनी गोंयच्या घुंवळे वखदां मळाचेर कितें उजवाड पडटा काय करबट, बुराटे फारावन व्हडलें नुस्तें मेकळेंच उरता, तें दिसतलें.
प्रितेशान हैदराबाद पुलिसांक आपूण फोंडेचो आनी ‘उण्या वेळांत चड पयशे जोडपाक हणजुण्यां आयिल्लों’, अशें सांगलां. थंय खंय ताका काश्मिरी तरणाटो मेळ्ळो आनी उपरांत तो ह्या घुंवळे वखदां धंद्यांत देंवलो. पुलिसांनी नांवां दिल्यांत, तातूंत गोंयकार तरणाटे आसात. कमी मोलान ड्रग्स घेवन मागीर ते चड मोलान विकप हो तांचो धंदो. गोंयांत येवपी पर्यटकांकूच न्हय, तर देशभरांत भोवन ते ड्रग्सांची ‘मागणी तशी पुरवण’ करताले, अशें पुलीस सांगतात. ह्या प्रकरणांत दर्यादेगां वयल्या कांय क्लबांचे धनीय आसात, अशें उक्ताडार आयलां. ते कोण ताची उमळशीक गोंयकारांक लागल्या आसतलीच. हाचे वयल्यान नेमकें कितें चल्लां ताचो अदमास येता. निदान आतां तरी गोंय पुलिसांनी हें प्रकरण चड गंभीरपणान घेवचें.
गोंयांतल्या ड्रग्सांचें हें ‘हैदराबाद कनेक्शन’ आमच्या राज्याची बदनामी करपी थारलां. एखाद्या राष्ट्रीय खबरां चॅनलान हो विशय घेत जाल्यार मागीर तांकां थातारता म्हणसर नाका पुरो जातलें. हांगा दरदिसा उणीच एकल्याक घुंवळे वखदां सयत अटक जाता. मात, मुखेल सुत्रधार पड्ड्या फाटल्यानूच उरतात. ते जेन्ना भायर येतले, तेन्ना ह्या बेकायदेशीर धंद्याक कांय प्रमाणांत तरी आळाबंद येतलो. समाजानूय सदांच जागृत रावंक जाय. पुलिसांक पालव दिवंक जाय. कारण कोण कितें करता, ताची बारीकसारीक म्हायती सरभोंवतणच्या लोकांक आसता. तातूंतल्यो कांय गजाली वावड्यो आसल्यो तरी, चवकशे उपरांत सत्य उजवाडाक येवं शकता. घुंवळे वखदां घेवपी व्यक्ती तर रोखडीच वळखुपाक येता. कोरोना पयलींच्या काळांत शाळा, काॅलेजीं मुखार ड्रग्स पावलां, अश्यो खबरो आयिल्ल्यो. ह्या धंद्यांत लाखांनी रुपयांची उलाढाल आशिल्ल्यान अजूनय ते चलता आसतले. हाचेर सरकारी यंत्रणांक (समाजाकूच) लिपचोरयां नदर दवरची पडटली. दोशींक धरचे पडटले. कारण फुडाराची पिळगी ही देशाचो आदारस्तंभ आसता. राज्य, देश मुखार चलोवपाची जापसालदारकी तांच्याच भुजांचेर पडटा. पूण, ही पिळगीच जर व्यसनी जाली, तर आमच्या देशाक म्हासत्ता करपाचें आमचें सपन कशें पुराय जातलें? घुंवळे वखदांक लागून समाज बरगेलो जाल्यार कितें जातलें, ताचोय दरेकल्यान भारतीय नागरिक म्हूण विचार करचो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
