भांगरभूंय | प्रतिनिधी
हडफड्यां आयपीएल बेटींग प्रकरणांत हणजूण पुलिसांनी पांच जाणांक अटक केली. ह्या सट्ट्या खातीर वापरिल्ल्यो अडेज लाखांच्यो वस्तू पुलिसांनी जप्त केल्यो. पुलिसांनी शुक्रारा रातीं ही कारवाय केली. मुंबय इंडियन्स आनी गुजरा टाईंटन्स हांचे मदीं जाल्ले मॅची वेळार पुलिसांनी ही कारवाय केली. अटक केल्ल्या दुबावितां मदीं शैलेश जनार्दन (39), सुमन हरिशित (25), अमिथ कुमार (37), सुमथ शेट्टी (24) आनी प्रजेश रामचंद्र (33) अशीं अटक केल्ल्यांचीं नांवां आसात आनी ते सगले कर्नाटकांत रावपी आसात.
हडफडेंतल्या जडे गार्डन इमारतींतल्या फ्लॅटांत आयपीएल क्रिकेट मॅचीचेर बेटींग सुरू आशिल्ल्याची माहिती पुलिसांक मेळ्ळी. त्या प्रमाण पुलिसांनी ह्या फ्लॅटाचेर धाड घाली. ह्या वेळार वयले दुबावीत आॅनलायन पद्दतीन बेटींग घेतात म्हणपाचें दिसून आयलें.
पुलिसांनी ते सुवाते वयल्यान लॅपटाॅप आनी हेर इलेक्ट्राॅनिक वस्तू मेळून अडेज लाखांचो म्हाल जप्त केलो. दुबावितांक गोंय दमण, दीव जुगार प्रतिबंधक कायद्या प्रमाण गुन्यांव दाखल करून तांकां अटक केल्या. हांगाच्या पयलो वर्ग न्यायालयान दुबावितांची जामिनाचेर सुटका केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
