भांगरभूंय | प्रतिनिधी
सोशल मिडीया बरी, पूण दिसांतल्यान वर, देड वरुच वापरल्यार. रातदीस मोबायल फोन धवळीत बसप चुकीचें
आयच्या धांवपळीच्या संवसारांत सोशल मिडीया हो सगल्यांच्या जिविताचो एक मुखेल वांटो जाला. तरणाटी पिळगी तर विचारूंच नाका. वराचीं वरां हातूंत फुकट घालयत आसा. उठसूठ सोशल मिडीया. ताचे बगर तांचें पान हालना. वाटेर चलतना, गाडी चलयता पसून थोडे मोबायल पळयत आसतात. हें सामकें धोक्याचें. सोशल मिडीया ही आयचे पिळगे मदीं ताणतणावाचे व्हडलें कारण जालां. जायते लोक आपलो मोलादीक वेळ सोशल मिडीयाचेर खर्च करतात. आपलीं कामां, अभ्यास, इश्ट, सोयरे, गांवांतल्यो कार्यावळी, खेळ, घरचीं हांचे पसून पयस रावतात. परिस्थिती तांकां एकटी उडयता. ते मानसीक तणावाक बळी पडटात. चडश्यां एकटेपणाची संवय जाता. ते आपली तुळा हेरां वांगडा करतात. आपूणय तांचे भशेन करपाक वतात आनी आपल्याच पांयांचेर फातर मारून घेतात.
बरेच तरणाटे रातीं उसरां मेरेन सोशल मिडीया, गेमी, व्हिडियो पळयत आसतात. कांय जाण तर रातभर जागे रावतात. तांचें जेवण, खाण वेळार जायना. एकेकदा ते उपासी रावतात. तांकां फावशी झेम मेळना. तांची किरकीर वाडटा. दोळे, मेंदवाचीं दुयेंसां वाडटात. जागरण केल्ल्यान दोळ्यांत न्हिदे खातीर जापसालदार आशिल्ल्या मेलोटोनियम हार्मोन्सांचें सामकें लुकसाण जाता. ताका लागून नदर पिड्ड्यार जाता.
सोशल मिडीयाचें वेसन लागिल्ल्यान आपलें कितेंतरी चुकलां हाची सतत जाणीव जाता. फोमो नांवाच्या भंयान मानसीक तणाव, हुस्को निर्माण जाता. केन्ना केन्ना सोशल मिडियाचेर आॅनलायन छळणूक, धमक्यो हाका तोंड दिवचें पडटा. आयजकाल सोशल मिडीया वयल्यान बुरशे फोटो, मॅसेजी धाडपाचे सत्र चालू आसा. ह्या सगल्या गजालींक लागून मनशाचो वास्तवीक जगा वांगडा संपर्क तुट्टा आनी तो एकटो पडटा. ताचो ताणतणाव वाडटा.
सोशल मिडीयाचेर दिसाक कितलीं वरां घालोवचीं हें पयलीं थारावपाक जाय. आपलें कुटुंब, शेजारी, इश्ट हांचे वांगडा वेळ घालयात. गजाली मारात. टीव्हीचेर एखादो बरोसो हलको फुलको सिनेमा पळयात. विनोदी कार्यावळ पळयात. माय- सुन, घरांतली पाताळयंत्री बायल असल्यो सिरीयल पळोवपा परस हें बरें. विद्यार्थ्यांनी शक्य तितलो वेळ मन लावन अभ्यास करचो. लागच्या मैदानाचेर खेळपाक वच्चें, पूण सादारण वर- देड वर. थोडे सद्दां 8 -10 किलोमिटर पयस खेळपाक वतात, तें चुकीचें. कारण हालींच्या काळांत अपघात वाडल्यात.
सोशल मिडीया बरी, पूण दिसांतल्यान वर, देड वरुच वापरल्यार. रातदीस मोबायल फोन धवळीत बसप चुकीचें.
– सिद्धी तिळवे
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
