सुटके झुजार्‍यांच्या बलिदानाक लागून देशाची उदरगत:रंजीता प्रभू

भांगरभूंय | प्रतिनिधी

शेळप- खुर्द सरकारी मुळाव्या विद्यालयांत प्रभात फेरी

वाळपय : सुटके झुजार्‍यांच्या बलिदानांतल्यान देशाक जें स्वातंत्र्य मेळ्ळें, ताका लागून आयज देशाची नेटान उदरगत जायत आसा. आयज भारतान सगळ्या मळांचेर उदरगत केल्या. संवसारीक पांवड्यारूय भारत देश फुडें सरतूच आसा. ताका लागून दरेका भारतियान आपलें योगदान दिवप गरजेचें अशें शेळप- खुर्द सरकारी मुळाव्या विद्यालयाची मुख्याध्यापिका रंजीता प्रभू हांणी सांगलें.

आझादी का अमृत महोत्सवा खाला अमृत महोत्सवी स्वातंत्र्य दिसा निमतान विद्यालया वतीन आयोजीत केल्ल्या प्रभात फेरी कार्यावळींत ते उलयताले.

ह्या वेळार भुरग्यांनी व्हडा प्रमाणांत वांटो घेवन गांवांत फेरी काडली. देशभक्ती, राष्ट्रभक्तीच्यो घोशणां दीत गांवांत जनजागृती केली.

उपरांत आयोजीत केल्ले एके कार्यावळींत रंजिता प्रभू हांणी भारताच्या संविधानाचो आदर राखप गरजेचें. देशभक्ती, राष्ट्रभक्ती दरेकल्याच्या मनांत रुजप गरजेचें. अशें जाल्यार भारताची उदरगत नेटान जातली, अशें तांणी सांगलें.

शेळप खुर्द सरकारी मुळाव्या विद्यालयाच्या पालक शिक्षक संघ, शिक्षक आनी भुरग्यां कडल्यान विद्यालयाचे पुरायेन उदरगतीचे नदरेन खूबशे उपक्रम राबयतात. ताका बरें सहकार्य मेळिल्ल्यान तांणी समाधान उक्तायलें.

सुरवातेक भारत मातेच्या फोटोक फुलांचो हार अर्पण करून हे कार्यावळीची सुरुवात जाली. उपरांत हातांत तखटे घेवन घोणशणां दीत भुरग्यांनी गांवांत फेरी काडली. हातूंत पालकांनी लेगीत व्हडा प्रमाणात भाग घेतिल्लो.