भांगरभूंय | प्रतिनिधी
सांगें: सांगेंच्या विलियण गांवांत सुभाष गांवकार हांच्या घरांत बिबटो घुशिल्ल्यान बरोच बोवाळ जालो. मात ह्या बिबट्यान कोणाकूच कांय करूंक ना.
सविस्तर म्हायती प्रमाण, आयज २८ तारखेर सकाळच्या स वरांचेर गांवच्या मुखेल रस्त्यान बिबटो चलत येतना दिसलो. तेन्ना सगळे लोक थंय एकठांय आयले. जमिल्ल्या लोकांक पळोवनूय पळोवंक नाशिल्ले भशेन करून हो बिबटो सरळ सुभाष गांवकार हांच्या फाटल्या दारांतल्यान घरांत भितर सरलो आनी तांच्या बाथरूमांत वचून बसलो. हें पळोवन घरांतल्या लोकांनी फुडल्या आनी फाटल्या दाराक कुलूप लायलें आनी रान खात्याक संपर्क केलो.
रान खात्याचे कर्मचारी रोखडेच थंय पावले. घराचें फुडलें दार उघडून घरांत प्रवेश केलो आनी जाळयेच्या आदारान बिबट्याक धरलो.
हे विशीं हांगच्या लोकांनी वेगवेगळ्यो प्रतिक्रीया दिल्यो. आयज रानवटी जनावरां रस्त्यांचेर आयिल्लीं पळोवपाक मेळटात. सांजेवेळार सात वरां उपरांत गव्याक लागून उगें गांव काडले उपरांत मुखार जीव मुठींत धरून वच्चें पडटा. हातूंत जनावरांची कितें चूक? रान खात्यान जनावरां खातीर रानांत फळां आनी उदकाची वेवस्था करपाक जाय आशिल्ली. रानांत उदकाचें तळें मारिल्लें जाल्यार जनावरांची तान थंयच भागपाची. रानांत तळीं नाशिल्ल्यान तानेन वळवळत जनावरां रानांतल्यान उदकाच्या सोदांत भायर सरतात. जनावरां खातीर रान खात्यान दोंगराचेर उदकाची वेवस्था करची, अशी मागणी नागरिकांनी केली. थंय तण, फळांची झाडां लायत जाल्यार तीं खावपाक हरणां, गवे, दुकर येतात. वागांक मागीर शिकार मेळटा. पूण सृश्टीचें हें चक्र मनशाच्या आळस आनी सुवार्थाक लागून बंद पडलां, अशें एका तरणाट्यान सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
