भांगरभूंय | प्रतिनिधी
नाशण्याची लागवड पुनर्जिवीत करपा खातीर वाळपय कृशी विभागाचे यत्न
भांगरभूंय । प्रतिनिधी
वाळपय: सत्तरी म्हालाच्या कांय वाठारांनी नाशण्याचें पीक व्हड प्रमाणांत घेवचे खातीर वाळपय विभागीय कृशी कार्यालया वतीन यत्न चल्ल्यात. मेळिल्ले म्हायती प्रमाण अंदूं चार हेक्टर जमनींत नाशणें रोयतले, अशें अधिकाऱ्यांनी म्हणलां.
एका काळार सत्तरी म्हालांत व्हड प्रमाणांत नाशण्याचें उत्पादन जातालें. चड करून दोंगराळ वाठारांत चड प्रमाणांत नाशणें रोयताले. खूबशा कारणांक लागून तें उत्पादन ल्हवू ल्हवू बंद पडपाक लागलें. आतां मेजक्याच वाठारांनी कांय प्रमाणांत नाशणें ओंपतात. अंदूं नाशण्याचें उत्पादन वाडोवपा खातीर वाळपय विभागीय कृशी कार्यालयान नेट लायला. वाळपय विभागीय कृसी अधिकारी विश्वनाथ गांवस हांणी दिल्ले म्हायती प्रमाण अंदूं चार हेक्टर जमनीर नाशण्याचें उत्पादन करतले. ते संबंदांतली पूर्वतयारी नेटान चालू आसा. वाळपय विभागीय कृशी कार्यालयांत सध्या नाचण्याचें बीं मेळटा. शेतकारांक तें सवाय भितर दितात. तशेंच विभागीय कृशी कार्यालयान तरवो काडला. रोखडोच तो शेतकारांक दिवपाक सुरवात करतले. जांकां तो जाय तांणी रोखड्या रोखडो कार्यालया कडेन संपर्क करचो, असो उलो गांवस हांणी मारला.
रान खात्याचे यंत्रणेचो नाशणे पिकाक धपको
गोंयचे पयले मुख्यमंत्री भाऊसायब बांदोडकार हांणी सत्तरी म्हालांतल्या दोंगराळ वाठारांनी पुरण शेती लागवड पद्दत चालीक लायली. दोंगराळ वाठारांत जमीन तयार करून थंय नाशण्याची लागवड करताले. सुमार दोन दसकां अशे तरेचे लागवडी कडेन सत्तरी म्हालांतल्या शेतकारांनी विशेश लक्ष दिल्लें. मात रानखात्याची यंत्रणा अस्तित्वांत येतसावन दोंगराळ वाठारांनी कुमेरी शेतीची लागवड ल्हवू ल्हवू बंद जावपाक लागली. सध्या पुरण शेतीची लागवड पुरायेन बंद जाल्या. सध्या नाशणें लागवडी कडेनूय आडनदर जाल्या आनी ती मेजक्याच वाठारांनी बाकी उरल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
