भांगरभूंय | प्रतिनिधी
अर्थीक आनी राजकी संकश्टाक लागून फुडारांत जावपी आशिया करंड टी-20 सर्तीची येजमानकी करपाचे स्थितींत आमी ना अशें श्रीलंका क्रिकेट मंडळान आशिया क्रिकेट समितीक कळीत केलां.
सध्याच्या ह्या संकश्टाक लागून लंका प्रिमीयर लिगेचो (एलपीएल) तिसरो हंगाम स्थगीत केल्लो.
आमच्या देशांतली राजकी आनी अर्थीक परिस्थितीक लागून आनी खास करून परकी चलनाचो संबंद येता थंय व्हड सर्त आयोजीत करपा खातीर ही आदर्श स्थिती ना अशें श्रीलंका क्रिकेट मंडळाच्या एका अधिकाऱ्यान सांगलें.
श्रीलंका फाटीं सरल्या उपरांत आशिया क्रिकेट समिती आतां ही सर्त संयुक्त अरब अमिरात वा हेर देशांनी करपा विशीं विचार सुरू केला.
आशिया करंड टी-20 सर्त ही ऑस्ट्रेलियेंत जावपी संवसारीक टी-20 सर्ती पयलीं ऑगस्ट-सप्टेंबरांत जावपाची आसा. कांय दिसांनी आशिया क्रिकेट समिती सर्तीचे नवे सुवातेची घोशणा करपाची शक्यताय आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
